کۆمەڵێک لە مامۆستا و خوێندکاران و کەسایەتییە ئایینیەکان لە ڕۆژهەڵاتی کوردستان، سەبارەت بە سزای بەندکران و داماڵینی بەرگی مامۆستایەتی لە مامۆستا لوقمانی ئەمینی لە پەیامێکدا هەڵوێستیان دژ بەو سزایە دەربڕی.
لەو پەیامەدا هاتووە مامۆستا لوقمانی ئەمینی وەک مامۆستایەکی خۆشناوی ئایینی بە هۆی هەڵوێستە بوێرانە و بەجێیەکانی لە کاتی ڕووداوە هەستیارەکان و هەوڵە چڕەکانی بۆ لەیەک نزیککردنەوەی موسوڵمانانی کوردستان، جێی خۆی لە دڵی خەڵکانی کوردستاندا کردووەتەوە و جێی ڕێزی جەماوەری نیشتمانە.
بۆیە بە تاوانی ناڕەوا و ناڕوونی ''بێڕێزی بە پیرۆزییەکانی ئیسلام'' لەلایەن دادسەرای تایبەت بە ڕۆحانیەکانی تارانەوە، سزای سێ ساڵ و یەک مانگ بەندکران و لێئەستانەوەی هەتاهەتایی بەرگی مامۆستایی بەسەردا سەپاوە.
لەو پەیامەدا هاتووە، مامۆستا لوقمان کە بۆ تەنیا جارێک بێڕێزی بە ئەو نەویستانەی خۆی نەکردووە کە هێندێک جار حوکمی کوفر و سەربڕینی ئەو پیاوە مەزنەیان داوە، چۆن و کەی و بە کام ئاماژەیە بێڕێزیی بە پیرۆزییەکانی ئیسلام کردووە؟
لەو پەیامەدا بە ئاماژە بە ئایەیەکی قورئان وتوویانە: ''ڕادەربڕین تەنانەت سەبارەت بە خوداش قەدەغە نییە و ڕێگەپێدراوە.''
لە درێژەی ئەو پەیامەدا باس لەوە کراوە کە لە شەریعەتی ئیسلامدا بەرگ و لیباسی کۆمەڵایەتی و تاکەکەسی هەڵبژاردنێکی ئازادە و هیچ بەڵگەیەکمان لەسەر ئەوە نییە کە حکوومەت بۆی هەیە دەستێوەردان لە بەرگ و پۆشاکی خەڵکی ژێر فەرمانیدا بکات.
لە بەشێکی دیکەی ئەو پەیامەدا هاتووە: ''حکوومەتی کۆماری بە ناو ئیسلامیی ئێران بە پێچەوانەی دروشمە کلۆر و بێ ناوەرۆکەکانی، نەک هەر ئیسلامی نییە، بەڵکوو لە کردەوەدا حکوومەتێکی تێئۆکرات تووتالیتێری فیرعەونیە، هیچ کە دەستتێوەردان لە بەرگ و لیباس و ڕووی دەرەکی ژیانی خەڵکیدا دەکات تەنانەت بەوەوە ناوێستێتەوە و دەیهەوێت فکری خەڵکیش داگیر بکات.''
لە کۆتاییدا هاتووە: ''وەک مامۆستایان و خوێندکاران و کەسایەتییە ئایینیەکانی ڕۆژهەڵاتی کوردستان سەر کۆنەی ئەو سزا نادادپەروەرانەیە سەبارەت بە مامۆستا لوقمانی ئەمینی دەکەین و هۆشدار بە دەسەڵاتدارانی ئەو ڕێژیمە نیوەگیانە دەدەین کە ئەگەر پێ لە بەڕەی خۆتان زیاد ڕاکێشن، تووشی کاردانەوەی توندی جەماوەری خەڵکی کوردستان دەبنەوە.
