بنەماڵە مافخوازەکانی کوردستان بە دەرکردنی بەیاننامەیەک خوازیاری لەنێوچوونی کۆماری ئیسلامی بوون و ئەم نیزامەیان بە بەرپرسی کوژرانی ئازیزانی خۆیان و هەموو هاووڵاتییەکی بێتاوان زانی.
٢٥ بنەماڵەی مافخوازی کورد کە بەیاننامەکەیان واژۆ کردووە ڕایانگەیاندووە کە هەر کەس یان گرووپێک کە لە ڕێگای ڕووخانی ئەم ڕێژیمەدا و وەدیهاتنی دادپەروەری، دێموکراسی، ئازادی و یەکسانی هەنگاو هەڵ بگرێت بایەخدارە، تەنانەت ئەگەر هەڵوێستێکی سیاسیی جیاوازیشی هەبێت.
بەیاننامەکە بە ئاماژەدان بە هەڵاواردنە بەربڵاوەکان لە کوردستان نووسیویەتی: "کوردستان دەیان ساڵە بەرەوڕووی هەڵاواردنە ئابووری، مێژوویی، کولتووری و سیاسییەکان بووەتەوە و ئەمە ڕاستییەکی حاشاهەڵنەگرە کە دەبێت دەنگی ببیسترێت".
واژۆکەرانی بەیاننامەکە پشتڕاستیان کردووەتەوە کە ئەوان نایانهەوێت کە لە دواڕۆژی ئازادیدا بە هیچ شیوەیەک ئەم چەشنە هەڵاواردنانە دووپات ببنەوە و جەختیشیان کردووەتەوە کە یەکێک لە داواکارییە سەرەکییەکانیان، "لابردنی هەڵاواردن و ناوەندگەرایی ڕاستەقینە" لە ئێراندایە.
بەیاننامەکە لە بەشێکی دیکەدا بە ئاماژەدان بەوەی کە ئەگەر حکوومەتێک نەتوانێت دادپەروەری مسۆگەر بکات، ڕەوایی خۆی لەدەست ئەدات، زیادی کردووە کە داواکارییان ئەوەیە لە ئێرانی دواڕۆژدا هیچ هاووڵاتییەک هەست بە کەمتربوونی مافەکانی لەچاو کەسێکی دیکە نەکات.
نەمانی هەڵاواردن لە ئێرانی دواڕۆژدا بەهۆی جیاوازیی زمان، شوێنی ژیان و هەستی هاووڵاتیی پلە دووهەم بوون، یەکێکی دیکە لە داواکارییەکانی ئەم بنەماڵانە بووە.
هەروەها لە کۆتایی بەیاننامەکەدا هاتووە: "ئێمە خوازیاری دادپەروەری و دێموکراسی بۆ هەموو ئێرانین، نەک تەنیا بە دروشم، بەڵکوو لە کردەوەشدا ئێمە بۆ دادپەروەری، یەکسانی و ئازادی خەباتمان کردووە و خۆڕاگری دەکەین".
