بەهۆی چوونەسەرەوەی پلەی گەرما، بەردەوامیی قەیرانی ئاو و پچڕانی کارەبا، بەرپرسانی ڕێژیمی ئێران بۆ چەندەمین جار لە ماوەی حەفتەی ڕابردوودا ئیدارە، بانک و ناوەندە پەروەردەییەکانیان داخستووە.
ڕۆژی سێشمەممە ١٤ی گەلاوێژ، بەرپرسانی ڕێژیم نەک هەر لە پارێزگا گەرمەسێرییەکانی ناوەندی ئێران، بەڵکوو لە پارێزگا ساردەسێرییەکان لەوانەش ئەردەبیڵ، زەنجان و سنە پشوویان ڕاگەیاندووە.
هەروەها ڕۆژی دووشەممە، پارێزگاری تاران ڕایگەیاند کە لە دوای چوونەسەرەوەی پلەی گەرما و پێویستیی دەسپێوەگرتن، چالاکیی دەزگا و ئیدارەکان لە پارزیگای تاران بۆ ڕۆژی چوارشەممە، ڕادەگیرێت.
پێشتریش بەرپرسانی ڕێژیم لەبارەی ئەو قەیرانانەوە ڕایانگەیاندبوو کە هاوکات لەگەڵ وشکەساڵیی پێنج ساڵی ڕابردوو و کەمبوونەوەی بارینەکان، پاشەکەوتی ئاوی بەنداوەکان لە دۆخێکی قەیراناویدایە و بەشێکی بەرچاو لە بەرهەمهێنانی کارەبا کە لە ڕێگەی ئاوی بەنداوەکانەوە بەرهەم دەهێندرێت، کەمی کردووە.
مەسعوود پزشکییان سەرۆککۆماری ڕێژیم لە ڕێکەوتی ٣١ی پووشپەڕ لەبارەی کەمیی ئاو هۆشداری دا و ئەو قەیرانەی بۆ بەڕێوەبەریی نادروست لە ڕابردوو گەڕاندووەتەوە لەوبارەوە وتوویتی: "بۆ بەردەوامبوون لە ژیان چیتر تاران وەکوو پێتەخت نامێنێت".
پزشکییان هەروەها لە ڕۆژی ٩ی گەلاوێژدا باسی لەوە کردبوو کە ئەگەر بەکارهێنانی ئاوی تاران کۆنتڕۆڵ نەکرێت ئەوا هەتا کۆتایی مانگی ڕەزبەر ئاوێک لە بەنداوەکاندا نامێنێت.
