ڕۆژی سێشەممە ٢٥ی خەرمانانی ١٤٠٤، پێشمەرگەیەکی پێشووی حیزب بە ناوی کاک خدر محەممەدی، ناسراو بە خدر سەلیمی، خەڵکی سوورەبانی ناوچەی سەردەشت و دانیشتووی پیرانشار، بە هۆی ڕووداوی هاتوچۆ کۆچی دوایی کرد.
ناوبراو لە سەرەتای ساڵی ١٣٦٠ی هەتاوی بەرگی پیرۆزی پێشمەرگایەتیی لەبەر کرد.
کاک خدر بەهۆی ئازایەتی و بوێری لەنێو ڕیزەکانی پێشمەرگاییەتیدا ناو و ناوبانگی تایبەتی هەبوو.
ناوبراو لە هێزی شەهید موعینی و دواتر لە لکی ٢ی قارەمانان کە پاشان بوو بە هێزی شەهید مینەشەم و لە لکی ٣ی ئەو هێزە پێشمەرگایەتیی کرد و دواتر لەسەر ئیزنی حیزب گەڕایەوە نێوخۆی وڵات .
ئەو مرۆڤە نیشتمان‌دۆستە، هیچ کات پەیوەندی خۆی لەگەڵ کادرە تەشکیلاتییەکان نەپچڕاند و بە بەردەوامی بەپێی هەلومەرج لەگەڵیان لە پێوەندیدا بوو و هەر کات ئەرکی بۆ دیاری دەکرا بەوپەڕی لەخۆبردووییەوە بەجێی دەگەیاند و لە هیچ دڵسۆزیەک لەپێناو ڕێگا و ڕێبازی کوردایەتیدا، کۆتایی نەدەکرد.
ناوەندی ڕاگەیاندنی حیزبی دێموکراتی کوردستانی ئێران بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
