ڕۆژنامەی ''ئیسرائیل هیۆم'' بڵاوی کردەوە، هەوڵە دیپلۆماتیکەکان لەگەڵ کۆماری ئیسلامی گەیشتووەتە بنبەست و ئەگەری شەڕێکی نوێ، توندتر و توندوتیژتر لە ڕابردوو، لە ئارادایە.
ڕاپۆرتەکە جەخت لەوە دەکاتەوە کە دوای شەڕی ١٢ ڕۆژەی ئەم دواییە، تاران بەجێگەی هەڵسەنگاندنی زیان و لێکەوتە مرۆییەکان، مانەوە و توانای دەستبەجێ گۆڕینی فەرماندە کوژراوەکان وەک نیشانەی خۆڕاگری و سەرکەوتن زەق دەکاتەوە.
''ئیسرائیل هیوم'' هۆشداریشی دا لەوەی ئەگەر ململانێیەکی نوێ ڕوو بدات، ڕەنگە پاڵپشتیی بەرفراوان و سەرسوڕهێنەری ئەمریکا و سیستمە پێشکەوتووەکانی پێشووتری لەبەر دەستدا نەبێت و ئامادەکاریی زیاتری ئێران پێکهاتەیەکی ئاڵۆز و مەترسیدار بۆ ئیسرائیل دروست دەکات.
کاربەدەستانی کۆماری ئیسلامی لەوانە عەلی لاریجانی و یەحیا ڕەحیم سەفەوی بە ئاشکرا باسیان لە درێژەدان بە شەڕ کردووە و جەختیان لەسەر ئامادەکاریی سەربازی کردووەتەوە، بێ ئەوەی گرینگی بە تێچووی مرۆیی، ئابووری و سیاسیی ئەو سیاسەتە مەترسیدارانەیە بدەن.
سیاسەتە شەڕەنگیزانەکانی ڕێژیم، گرینگیدان بە توانای نیزامی و هەڕەشە ناوچەییەکان، جارێکی دیکە نیشانی داوە کە کۆماری ئیسلامی ئامادەیە خەڵک و سەرچاوەکانی ئەو وڵاتە لەپێناو ئامانجە ئیدیۆلۆژییەکانیدا بکاتە قوربانی و سەقامگیریی ناوچەکە بخاتە مەترسییەکی گەورەوە.
