مێهدی کەڕووبی، یەکێک لە مۆرە دێرینەکانی کۆماری ئیسلامی کە دوای ناڕەزایەتییەکانی ساڵی ١٣٨٨ لە دەسەڵات دوور خرایەوە، لە دیدارێکدا لەگەڵ کۆمەڵێک چالاکی سیاسی ڕەخنەی لە دۆخی زیندانەکانی ئێران گرت و بارودۆخی ئێستای بە "شەرمەزارکەر" ناو برد.
ڕۆژی شەممە ٩ی خەزەڵوەر، مێهدی کەڕووبی بە ئاماژەدان بەو ڕاپۆرتانەی لە زیندانی ژنانی قەرچەکەوە بڵاو کراونەتەوە، وتی: ''بەندکراو ئەمانەتە و حکوومەت لە پاراستنی ژیان و تەندروستی بەرپرسیارە، بەڵام بەداخەوە هەواڵی زۆر تاڵ لە زیندانەکانی تاران و ئەو شارانەی کە کەمترین پێوەرەکانی مرۆیی و ئەخلاقی تێدا ڕەچاو ناکرێ، دێت.''
ناوبراو ئاماژەی بەوەش کرد، پێویستە دەسەڵاتی دادوەری بزانێت کە ناتوانێت بە دەرکردنی سزای قورس و دەسبەسەریی سەرەڕۆیانە دەنگی خۆپیشاندەران بێدەنگ بکات.
کەڕووبی داوای لە کاربەدەستانی ڕێژیم کرد کە ڕەوتی دەسبەسەرکردنی سەڕەڕۆیانە ڕابگرن و لەبری زیندانیکردن سزای بەدیل بەکار بهێنن.
کەڕووبی کە خۆی بۆ ساڵانێک سەرۆکایەتیی دامودەزگاکانی ڕێژیمی دەکرد، لەوانە سەرۆکی مەجلیس و بونیادی شەهید، ئێستا بووەتە ڕەخنەگرێک لەو پێکهاتەی دەسەڵاتە کە سەردەمانێک خۆی بەشێک لەو بووە.
جەختیشی لەوە کردەوە کە وەرگرتنی دانپێدانان لەژێر گوشار و ئەشکەنجەدا هیچ بەهایەکی یاسایی نییە، ئیسلام نامۆیە بەو جۆرە ڕەفتارانە و هیچ حکوومەتێک ناتوانێت بە زەبری هێز و فێڵکردن بژی.
ئەم لێدوانانەی کەڕووبی لەکاتێکدایە کە خۆی لە دەیەکانی یەکەمی نیزامی ئیسلامیدا یەکێک لە داڕێژەرانی پێکهاتەی سەرکوت بووە و ئەم گۆڕانکارییە لە هەڵوێستدا زیاتر ڕەنگدانەوەی شکستی لایەنێک لە ناو ڕێژیمدایە نەک نیشانەی ئاڵوگۆڕی سیاسی.
