ڕۆژی شەممە ٢٠ی ڕەزبەری ١٤٠٤، کاک محەممەد مەلەکی، هونەرمەندی خۆشناوی خەڵكی سەقز کۆچی دوایی کرد.
ناوبراو یەکێک لە کەسایەتییە دیارەکانی کورد لە بواری هونەرەکانی تەڕاحی و خۆشنووسی بوو کە بە درێژایی تەمەنی خزمەتێکی شایانی بە خەڵکی شاری سەقز و دەوروبەری کرد.
ککا محەممەد لەنێو خەڵکدا بە مرۆڤێکی نیشتمانپەروەر و کوردخۆشەویست ناسرابوو کە دەرحەق بە پرسە نەتەوەییەکان خاوەن هەڵوێستی جێی سەرنج بوو.
برایەکی ناوبراو بە ناوی عەلی لە ڕیزەکانی شۆڕش بۆ ڕزگاریی خاکی کوردستان میداڵیای شەرەفی لە مل کرد و لە ساڵی ٦٥ی هەتاوی بە تۆمەتی ئەندامەتی لە حیزبی دێموکرات ئێعدام کرا و پەیوەست بە کاروانی سوورخەڵاتان بوو.
شەهید عەلی مەلەکی ساڵی ٦٢ بووە پێشمەرگە و لە هێزی شەهیدانی هەوشار پێشمەرگایەتیی کرد و لە هەموو عەمەلیاتەکانی شاری سەقزدا بەشدار بووە.
بەڕێز کاک محەممەد هەردەم بە فەخر و شانازییەوە ناوی برا شەهیدەکەی دەهێنا.
تەرمی ناوبراو لە گۆڕستانی ئایچیی سەقز بە خاک سپێردرا..
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
