ڕۆژی پێنجشەممە ٢٤ی ڕەزبەری ١٤٠٤، دوکتور تاهیری عەباسی ڕاد، کوڕی مامۆستا مەلائەحمەدی عەباسی ڕاد، پزیشکی پسپۆڕی مێشک و دەمار بە هۆی نەخۆشییەوە لە نەخۆشخانەی میلادی شاری ورمێ گیانی لەدەست دا.
ناوبراو لە ساڵی ١٣٣٩دا لە مەهاباد لە دایک بووە و قۆناغەکانی خوێندنی سەرەتایی، ناوەندی و دواناوەندیی لەو شارە تەواو کردووە و پاشان بۆ درێژەدان بە خوێندن لە زانکۆی پزیشکی تەورێز وەک خوێندکار لە بەشی مێشک و دەمار وەرگیراوە، کە بە سەرکەوتوویی قۆناغەکانی زانکۆی تەواو کردووە.
ناوبراو ساڵی ١٣٧٤ بۆ خزمەت بە خەڵک و نیشتمانەکەی دەگەڕێتەوە مەهاباد و لەو ماوەیەدا جگە لە کارەکەی خۆی و چارەسەری نەخۆشەکان، وەک کەسایەتییەکی نیشتمانپەروەر و خێرخواز لە خزمەتکردن بە گەلەکەی سڵ ناکاتەوە و دەبێتە کەسایەتییەکی خۆشەویست و جێی متمانەی خەڵکی مەهاباد و دەرووبەری.
تەرمی ناوبراو ڕۆژی هەینی ٢٥ی ڕەزبەری ١٤٠٤، لە ڕێوڕەسمێکی بەشکۆدا و بە بەشداریی هەزاران کەس لە خەڵكی مەهاباد و دەرووبەری بە خاک سپێردرا.
ناوەندی ڕاگەیاندنی حیزبی دێموکراتی کوردستانی ئێران، بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
