لە کاتێکدا باری قەیرانی ئابووری و گرانیی بێوێنە بەسەر ژیانی خەڵکی ئێرانەوە قورسایی دەکات و توانای کڕین و دابینکردنی پێداویستییەکانی ڕۆژانە بۆ خەڵک ڕۆژ بە ڕۆژ کەمتر دەبێت، شیرکەتی تەوانیری ڕێژیم باسی لە چوونەسەرەوەی نرخی ٥ بەرانبەریی کارەبا کردووە.
بەپێی ڕاگەیەندراوی شیرکەتی تەوانیری ڕێژیم، نرخی ماڵیاتی کارەبا لە سەرەتای وەزری پاییزەوە نزیک بە ٣٥ لەسەد گرانتر بووە و لەو ڕێکەوتەوە بەکارهێنەرانێک کە کارەبای زۆر بەکار دێنن هەتا ٥ قات زیاتر پارەیان لێ وەردەگیردرێت.
ئەمیر یاقووتی، بەڕێوەبەری گشتیی نووسینگەی بەڕێوەبریی وزە و بەرنامەڕێژیی کاروباری بەکارهێنەرانی شیرکەتی تەوانیر لە ئیددیعایەکی پووچدا وتوویەتی: "گرانتربوونی نرخی ماڵیاتی کارەبا پێوەندیی بە چوونەسەرەوەی داهاتی دەوڵەتەوە نییە و تەنیا بۆ جێگیرکردنی فەرهەنگی بەکارهێنانە".
بەپێی ئەو ڕاگەیەندراوەی تەوانیر، نرخی کارەبا لە ٧٥٢ تمەنەوە بۆ ٩٥٢ تمەن هەڵکشاوە و بەکارهێنانی زیاتر لە ٢.٥ بەرانبەری ئەو ڕێژەیە، نرخی ٥ قات زیاتری بۆ ڕەچاو دەکرێت.
ئەو گرانی و چوونەسەرەوەی نرخی کارەبا لەکاتێکدایە کە زۆربەی ناوچەکانی ئێران لە وەرزی گەرمی هاویندا ڕووبەڕووی پچڕانی کارەبا بوونەتەوە.
بە وتەی کارناسانی سەربەخۆ، دەوڵەتی ڕێژیمی کۆماری ئیسلامی بەجێگەی پەرەپێدانی ژێرخان و کەمکردنەوەی کەموکۆڕییەکانی بواری کارەبا، باری قورسی ناکارامەیی خۆیان دەخەنە سەر شانی خەڵکی بێدەرەتانی ئێران.
بە وتەی سەرچاوە سێنفییەکان، جیبەجێکردنی ئەو نرخە نوێیەی شیرکەتی تەوانیر لە مانگەکانی داهاتوو دەتوانێت ببێتە هۆی کەمبوونەوەی توانای کڕین و گوشاری ئابووریی زیاتر بۆ سەر خەڵکی ئێران بەتایبەت ناوچە گەرمسێرەکانیش بەهۆی بەکارهێنانی زیاتری کارەبا یەکێک لە قوربانییانی سەرەکیی ئەو گرانییەن.
