ئاگرتێبەردانە بەربڵاوەکان لە دارستانەکانی گوندی هەنجیران سەر بە شاری مەریوان چووەتە ناو شەشەمین ڕۆژەوە و بەشێکی بەرین لە ناوچە ڕووەکییەکان و ژینگەی سروشتی ئەم نەوچەیەی خستۆتە مەترسییەوە.
بەپێی ڕاپۆرتی ئەنجومەنی سەوزچیای مەریوان ئەم ئاگرتێبەردانە کە لە حەوتووی پێشووە دەستی پێکردبوو، تا ڕۆژی هەینی بە ئاگرتێبەردانی بەردەوام و گڕگرتنەوەی دووبارەی ناوچە جیاکانی دارستانەکان لەلایەن لایەنە ناسراوەکانەوە تا ئێستا بەردەوام بووە و بووەتە هۆی لەناوچوونی بەربڵاوی ناوچە سەوزاییەکان.
بە وتەی ئەم ئەنجومەنە، دامەزراوەکانی سەر بە ڕێژیم لە دوو ڕۆژی یەکەمدا پیشیان بە هاتنی خەڵک بۆ کوژاندنەوەی ئاگرەکە گرتووە، کە ئەمە ڕەوتی کوژاندنەوەی ئەم ئاگرەی خاو کردووەتەوە و خەسارێکی زۆری بەم ناچەیە گەیاندووە.
بەم حاڵەوە خەڵکی ناوچەکە، ئەندامانی ئەنجومەنی سەوز چیا و هێزەکانی سەرچاوە سروشتییەکان بە هەوڵی بەردەوام توانیویانە لە چەن نۆرەدا ئاگرەکە کۆنترۆڵ بکەن بەڵام ئاگرەکە هەر جارەو لە ناوچەیەک بە دەست دوژمنەکانی ژینگەی کوردستان لە دارستانەکەدا گڕ دەگرێتەوە.
ئاگردانە دوابەدوای یەک و بە ئەنقەستەکان لە گوندەکانی مەریوان لەوانە: هەنجیران، وشکەڵان، دەرەوەران، ساوجی، قوڵقوڵە، خانمەشێخان، کارێز، باشماخ، بایەوە، مڕانە، ئاسنەوە، دۆلوبێ، سەردۆش و پیران، لەم ساڵانەی ڕابردودا بۆتە دیاردەیەکی نیگەرانکەر.
ڕاپۆرتەکانی خەڵک و سەرچاوە ژینگەپارێزییەکان باس لە بەئەنقەستبوونی ئەم ڕووداوانە دەکەن و پشتگوێخستن و وڵامنەدانەوەی دامەزراوەکانی سەر بە ڕێژیم لەمبارەوە و هەروەها ڕێگیربوون لە ڕەوەتی کوژاندنەوەیان، دەستێدابوونی دامەزراوەکانی سەر بە ڕێژیم لەم ئاگرتێبەردانانەی ڕوونتر کردووە.
ئونجومەنی سەوز چیا هوشداری داوە کە بەردەوامیی ئاگرتێبەردانەکان نەک تەنیا ناوچە دارستانییەکان و جۆراوجۆری ژینگەیی لە ناوچەکەدا لەناو دەبات، بەڵکوو ئەمنییەتی ژینگەیی و بژێوی خەڵکیش دەخاتە مەترسییەوە.
