پڕۆژەی تەلاری ناوەندیی سنە کە بڕیار بوو لە ماوەی دوو ساڵدا دروست بکرێت، دوای ٢٢ ساڵ هێشتا تەواو نەبووە.
سەیدعەباس ساڵحی، وەزیری فەرهەنگ و ئێرشادی کۆماری ئیسلامی لە سەردانەکەی ئەم دواییەیدا بۆ ئەو پڕۆژەیە بەڵێنی دا کە لە ماوەی ساڵ و نیوێکدا تەواو دەبێت؛ بەڵێنێک کە زۆرێک لە هونەرمەندانی کورد بە دووبارەکردنەوەی بێکۆتایی بەڵێنەکانی پێشووی دەزانن.
پەیمانکاری ئەو پڕۆژەیە بە ئاماژەدان بەوەی کە تەنیا ئێمکاناتی ناوەوە و نەهێشتنی کەموکوڕییەکان ماوە، ڕایگەیاند کە قەرزێکی نەدراوی هەیە کە بڕی ٦٠ میلیارد تمەنە. ئەم پڕۆژەیە بە پێشکەوتنی فیزیکی ٩١ی لەسەدی، سینەما، شانۆ، هۆڵەکانی مۆسیقا، بەشی هونەر و ئیداریی لەخۆ دەگرێت.
بەڵام ڕاستییەکی تاڵ ئەوەیە کە فەرهەنگ و هونەر لە کوردستاندا کەوتووەتە قوربانی پشتگوێخستن و سیاسەتی ناوەندگەرایی کۆماری ئیسلامی.
دەوڵەتان یەک لە دوای یەک هاتوون و بەڵێنیان داوە، بەڵام هیچیان ئیرادەی جیددییان بۆ تەواوکردنی ئەم پڕۆژەیە نەبووە.
هونەرمەندانی ئەو پارێزگایە ساڵانێکە بەوپەڕی کەمیی ئیمکاناتی فەرهەنگی و هۆڵی نمایش کار دەکەن، لەکاتێکدا بە میلیاردها تمەن بۆ پڕۆژەکانی تاران و شارەکانی ناوەندی ئێران خەرج کراوە. تەلاری سنە هێمای بۆشایی قووڵی نێوان دروشمە فەرهەنگییەکانی ڕێژیم و واقیعی ژیانی هونەرمەندان لە ناوچە بێبەشەکانە.
