بەپێی ڕاپۆرتی ڕێکخراوە مافی مرۆییەکان چوار هاونیشتمانیی خەڵکی شارەکانی سنە و دیواندەرە لەلایەن هێزە سەرکوتکەرکانی ڕێژیمەوە دەسبەسەر کراون و بۆ شوێنێکی نادیار ڕاگوێزراون.
بەپێی ڕاپۆرتی ڕێکخراوی مافی مرۆڤی "هەنگاو"، سێ هاونیشتمانیی خەڵکی شاری سنە بە ناوەکانی "فەرشید مەنسووری"، "فواد مورادی" و "بێهنام نووری" و هانیشتمانییەکی دیکەی خەڵکی دیواندەرە بە ناوی "کاوە عەبدی" لەلایەن ئیدارەی ئیتلاعاتی ڕێژیمەوە لە سنە دەسبەسەر کراون و بۆ شوێنکی نادیار ڕاگوێزراون.
بەپێی ڕاپۆرتی گەیشتوو بە ڕێكخراوی مافی مرۆڤی هەنگاو، ئێوارەی ڕۆژی سێشەممە ٢٠ی خەزەڵوەر، فەرشید مەنسووری، تەمەن ٣٦ ساڵ، باوكی منداڵێكی بچووک و خەڵكی گەڕەكی عەباساوای سنە لە ماڵەكەی دەسبەسەر كراوە.
هەروەها، ڕۆژی دووشەممە ١٩ی خەزەڵوەر، بێهنام نووری، خەڵكی ئاوایی "قوڵیان" سەر بە سنە و كاوە عەبدی، تەمەن ٣٥ ساڵ و خەڵكی دیواندەرە دەسبەسەر کراون.
هاوكات، هاووڵاتییەكی دیكەی خەڵكی سنە بە ناوی فواد مورادی كە خێزاندار و باوكی منداڵێكە، لەلایەن هێزە سەرکوتکەرەکانی ڕێژیمەوە لە ماڵەکەیدا دەسبەسەر كراوە.
بە وتەی سەرچاوەیەكی ئاگادار، بێهنام نووری، چایی فرۆش لە ماڵی خۆی و كاوە عەبدی، ئەندازیار لە كاتی گەڕانەوە لەسەر كارەكەی لە دێولان بۆ دیواندەرە، دەسبەسەر كراون.
تا كاتی بڵابوونەوەی ئەم هەواڵە، لەسەر هۆكاری دەسبەسەركران و شوێنی ڕاگرتنی ئەم هاونیشتمانییانە زانیارییەک لەبەر دەستدا نییە.
