ئەنجومەنی قەڵەمی ئەمریکا بە دەرکردنی بەیاننامەیەک وێڕای پەیوەستبوونی خۆی بە کۆڕی ٣٠٠ نووسەر و مامۆستای زانکۆ، خوازیاری ئازادیی بێ مەرجی ئابووریناسان و توێژەران، نووسەران و توێژەرانی دەسبەسەرکراو لەلایەن ڕێژیمی تارانەوە بوو.
ئەنجومەنی قەڵەمی ئەمریکا "پێن ئەمریکا" لە ڕاگەیەندراوێکدا ئاماژەی بەوە دا کە لەپاڵ سەدان نووسەر و توێژەری ناوبەدەر داوایان لە ڕێژیمی ئێران کردووە کە توێژەران، نووسەران و وەرگێڕانی بەندکراو بەبێ مەرج ئازاد بکرێن.
یەکێک لە بەڕێوەبەرانی ئەو ئەنجومەنە پێداگریی لەسەر ئەوە کردووەتەوە کە ئەو کەسایەتییە دەسبەسەرکراوانە تەنیا و تەنیا بەهۆی کار و نووسینەکانیانەوە دەسبەسەر کراون.
بەپێی ڕاپۆرتی ساڵی ٢٠٢٤ی پێوەری ئازادیی نووسینی ئەنجومەنی قەڵەمی ئەمریکا، ٤٣ نوووسەر لە ئێران دەسبەسەر کراون و ڕێژیمی ئێران لەو بوارەوە پلەی دووەمی خەراپترین وڵات بۆ ئەو توێژەدایە.
پێشتریش چەند گرووپ و ئەنجومەنی دیکەی ئێرانی و جیهانی لە بەیاننامەی جۆراوجۆری ناڕەزایەتییدا بەنیسبەت ڕەوتی دەسبەسەریی نووسەران و جیابیران و خاوەن قەڵەمانەوە ناڕەزایەتییان دەربڕیبوو.
هەروەها کەمپەینی مافی مرۆیی ئێران حەوتووی ڕابردوو بە دەرکردنی بەیاننامەیەک وێڕای ئاماژەدان بە دەسبەسەرکردنی ٤ کەس لە لێکۆڵەر، وەرگێڕ و نووسەری ڕەخنەگر لەلایەن هێزە سەرکوتگەرەکانی ڕێژیمەوە نووسیبووی: "لە شوێنی ڕاگیران و هۆکاری دەسبەسەریی و تۆمەتی وەپاڵدراوی ئەو کەسانە هیچ زانیارییەک لەبەر دەستدا نییە".
شایانی باسە لە ماوەی حەفتەی ڕابردوودا هێزە سەرکوتگەرەکانی ڕێژیم بە هەڵکوتانە سەر ماڵی پێنج ئابووریناس و لێکۆڵەر لە تاران و دوای پشکنینی ماڵەکانیان و بردنی کەلوپەلی تاکەکەسییان دەسبەسەر و بۆ شوێنێکی نادیاریان ڕاگواستوون.
