ڕۆژی سێشەممە ٢٧ی خەزەڵوەری ١٤٠٤، دایە ناسکە ئاقایی، دایکی شەهیدێکی کوردستان لە تەمەنی ٩٠ ساڵیدا، لە ناوچەی هەوشار کۆچی دوایی کرد.
کوڕێکی دایە ناسکە بە ناوی موتەلیب ئامانی پێشمەرگەی حیزبی دێموکرات بووە کە لە تێکهەڵچوونێكدا چووەتە ڕیزی کاروانی شەهیدانی گەلەوە.
دایە ناسکە لە بنەماڵەیەکی شۆڕشگێر بووە و جگە لە کوڕەکەی چەند شەهیدی دیکەشیان پێشکەش بە بارەگای ئازادی کردووە.
ناوبراو خوشکی سۆفی مەحموود ئاقاییە کە پێشمەرگەی سەردەمی کۆماری کوردستان بوو و لە ڕێکەوتی ٤ی بانەمەڕی ۱٤۰۲ی هەتاویدا پاش نەخۆشییەکی درێژخایەن کۆچی دوایی کرد.
موتەلیب ئامانی ساڵی ١٣٤١ی هەتاوی لە گوێ ئاغاج لە دایک بووە. ناوبراو لە ڕێکەوتی ٢٦ی جۆزەردانی ١٣٦٢ی هەتاویدا و لە تێکهەلچوون لەگەڵ هێزەکانی ڕێژیمدا لە شوێنێک بە ناوی كوچەتەڵا شەهید بووە و تەرمەکەی لە گوێ ئاغاج بە خاکی کوردستان سپێردراوە.
دایە ناسکە هەتا دوایین ساتەکانی ژیانی وەفادار بە ڕێبازی دێموکرات مایەوە.
ناوەندی ڕاگەیاندنی حیزبی دێموکراتی کوردستانی ئێران بەو بۆنەوە سەرەخۆشی بنەماڵە، خزم و کەسوکاری ناوبراو دەکات خۆی بە هاوبەشی خەمیان دەزانێت.
