ڕۆژی چوارشەممە ٢٨ی خەزەڵوەری ١٤٠٤، کاک مەحموود قادری کەسایەتیی نیشتمانپەروەری خەڵكی گوندی قەڵای سەرقەڵا سەر بە شاری سەرپێڵی زەهاو، لە تەمەنی ٦٨ ساڵیدا و بەهۆی نەخۆشییەوە کۆچی دوایی کرد.
ناوبراو خوێندنی سەرەتایی تا پۆلی شەشی ئەوكات خوێندووە و دواتر ناچار دەبێت بۆ بژێویی ژیان شانبەشانی بنەماڵەكەی كار بكات.
دوای شۆڕشی گەلانی ئێران لە ساڵی ١٣٥٨ لەگەڵ بنەماڵەكەی پەڕیوەی كوردستانی باشوور دەبێت و دواتر لەلایەن حكوومەتی ئەوكاتی بەعسەوە بەزۆرەملێ ڕەوانەی كەمپی ئەڵتاش لە ڕۆمادییە دەكریت.
لە ساڵی ١٩٨٨ی زایینیدا پەیوەندی بە كۆمیتەكانی حیزب لەو ئوردوگایە دەگرێت و دەبێت بە ئەندامی حیزب.
دواتر وەک ئەندامی كۆمیتە ناوچە هەڵدەبژێردرێت و چالاكانە ئەركەكانی جێبەجی دەكات.
ناوبراو لەناو خەڵكدا كەسێكی نیشتمانپەروەر و خۆشناو بووە، بەهۆی بێدەرەتانیی ژیان لەو كەمپەدا لەگەڵ بنەماڵەكەی ناچار دەبێت لە ساڵی ١٩٩٦ زایینیدا بگەڕێتەوە بۆ ڕۆژهەڵاتی كوردستان.
دوای چەند مانگ لەلایان ئیتلاعاتی ڕێژیمەوە لە كرماشان بە هۆكاری سیاسی دەسبەسەر دەكریت و لەلایەن بەناو دادگای ئینقلابی كرماشانەوە حوكمی زیندانی هەتاهەتایی بۆ دەردەچێت و زیاتر لە ٢٠ ساڵ لە زیندانی دێزڵاوای كرماشان دەبێت.
كاک مەحموود یەكێک لەو كەسانەیە کە لە كرماشان درێژترین حوكمی سیاسیی لەلایان ڕێژیمەوە بۆ دەر كراوە .
دوای هەڵكشانی تەمەن بۆ ٦٠ ساڵ دەكەوێتە بەر لێبوردن و لە ساڵی ١٣٩٩ هەتاوی ئازاد دەكرێت. هەر دوای چەند مانگێک بە شێوەیكی گوماناوی تووشی ئازاری دڵ دەبێت.
ناوبراو تا دواساتەكانی ژیانی وەفادار بە ڕێبازی حیزبی دێموكرات مایەوە.
تەرمی ناوبراو لەنێو ئاپۆڕای خەڵكی ناوچەكە لە گوندی جاوریی زەهاو بەخاکی کوردستان ئەسپێردرا.
ناوەندی ڕاگەیاندنی حیزبی دێموکراتی کوردستانی ئێران بەو بۆنەوە سەرەخۆشی بنەماڵە، خزم و کەسوکاری ناوبراو دەکات خۆی بە هاوبەشی خەمیان دەزانێت.
