بەپێی هەواڵی گەیشتوو بە بەشی هەواڵی ناوەندی ڕاگەیاندنی حیزبی دێموکرات، خەڵکی ژینگەدۆستی کوردستان لەگەڵ بنەماڵەی شەهیدانی ئەم دواییەی ئاگرکەوتنەوەکەی ئاویەر لە شاری سنە، هەڵمەتێکی ژینگەپارێزییان بەڕێوە برد.
ڕۆژی هەینی ٧ی سەرماوەزی ١٤٠٤، کۆمەڵێک لە چالاکانی مەدەنی و ژینگەدۆستانی کوردستان لە شاری سنە، وێڕای ئەندامانی بنەماڵەی شەهیدان حەمید مورادی، خەبات ئەمینی و چیاکۆ یووسفی‌نژاد بە چاندنی نەمام و خاوێنکردنەوەی ئاویەر، یادی ئەم شەهیدانەیان بەرز ڕاگرت.
ئەم هەڵمەتە بەم دروشمە بەڕێوەچوو: "بۆ بەرزڕاگرتنی یادی حەمید مورادی، خەبات ئەمینی و چیاکۆ یووسفی‌نژاد نەمام دەچێنین کە بۆ ڕزگارکردنی ژینگە گیانیان بەخشی".
خەڵكی ژینگەدۆستی سنە لەم هەڵمەتەدا پەیامی وەفادارییان لەگەڵ شەهیدانی ژینگە نوێ کردەوە.
لە کاتی ئاگرگرتنی بەربڵاوی کێوی ئاویەر لە ٢ی گەلاوێژی ئەمساڵدا، چەند کەس لە چالاکانی ژینگەپارێزی خەڵکی سنە بە ناوەکانی حەمید مورادی، خەبات ئەمینی و چیاکۆ یووسفی‌نژاد بە سەختی بریندار بوون.
