هەژدەساڵ لەمەوبەر و لە ڕۆژێکی وەک ئەمڕۆدا، (٨ی سەرماوەزی ١٣٨٦ی هەتاوی بەرانبەر بە ٢٩ی نۆڤەمبەری ٢٠٠٧ی زایینی) لە هەناوی ئازار و ستەمی بێپسانەوەی کۆماری ئیسلامیی ئێران بەرانبەر بە بەندکراوانی سیاسی و ڕۆڵە تێکۆشەرەکانی گەلی کورد، ئەنجومەنی زیندانییە سیاسییەکانی ڕۆژهەڵاتی کوردستان وەک پێویستییەکی مێژوویی و وەڵامێک بۆ کپکردنی دەنگی ئازادیخوازان، دامەزرا. هەژدەساڵ تێکۆشان لە سەنگەری بەرگری لە ماف و کەرامەتی مرۆڤ، سەفەرێکی پڕ لە هەوراز و نشێو بووە، بەڵام کاروانەکە بە ورەیەکی پۆڵایینەوە بەردەوام بووە و ئاڵای بەرخۆدانی شەکاوە ڕاگرتووە.
لە ماوەی ئەم هەژدەساڵەدا، ئەنجومەنی زیندانییە سیاسییەکانی ڕۆژهەڵاتی کوردستان توانیویەتی ببێتە دەنگێکی دلێر و زوڵاڵ بۆ گەیاندنی ئازار و مەینەتییەکانی ئەو مرۆڤانەی کە لە تاریکترین گۆشەکانی زیندانەکانی ڕژێمدا، تەنیا لەبەر بیروڕای سیاسی و داواکردنی مافە ڕەواکانی گەلەکەیان، ڕووبەڕووی دڕەندانەترین شێوازی ئەشکەنجەی جەستەیی و دەروونی دەبنەوە. ئەم ڕێکخراوەیە لە ڕێگەی ڕاپۆرت و کاری بەردەوامی خۆی، توانیویەتی پرسی زیندانییانی سیاسی لە ڕۆژهەڵاتی کوردستان بە ڕۆژەڤ بکات و لە ئاستی ئەم تاوانانەدا بێدەنگ نەبێت.
یەکێک لە دەسکەوتە هەرە گرنگەکانی ئەنجومەنەکە، ئەوەیە کە وەک چەترێک ڕۆڵی هەبووە لە کۆکردنەوەی زیندانییە سیاسییە ئازادکراوەکان و بنەماڵە سەربەرزەکانیان. ئەم ڕێکخراوەیە بووەتە سەکۆیەک بۆ ئەوەی ئەم تێکۆشەرانە ساڵانە لە ڕۆژێکی دیاریکراودا پێکەوە کۆببنەوە، ڕێز لە خەبات و قوربانیدانی یەکتر بگرن و بەڵێنی بەردەوامیی ڕێبازەکەیان نوێ بکەنەوە. ئەم کۆبوونەوانە نەک هەر ڕێزگرتنە لە ڕابردوو، بەڵکوو وزە و هیوابەخشینە بە نەوەی ئێستا و داهاتوو بۆ درێژەدان بە خەبات لە پێناو ئازادی و دادپەروەریدا. بەم شێوەیە، ئەنجومەنەکە بووەتە پارێزەری یادەوەریی بەکۆمەڵی نەتەوەیەک و سیمبولی خۆڕاگری لە بەرانبەر ستەمدا.
ئەمڕۆ کە یادی هەژدەهەمین ساڵیادی دامەزراندنی ئەم ڕێکخراوە دەکەینەوە، وێڕای پیرۆزبایی و دەستخۆشی لە هەموو ئەندامان و دڵسۆزانی ئەم ڕێکخراوەیە، پێویستە جەخت لەوە بکەینەوە کە ڕێگای خەبات هێشتا درێژە و ئەرکەکان قورستر بوون. لە کاتێکدا کە فشاری ڕژێمی ئێران بۆ سەر چالاکوانانی سیاسی و مەدەنی چڕتر بووەتەوە، ئەرکی سەرشانی ئێمە و هەموو لایەنەکانی مافی مرۆڤ و ئازادیخوازەکانە کە زیاتر لە جاران پاڵپشتیی ئەم ئەنجومەنە و دۆسیەی زیندانیانی سیاسی بین. دەبێت بە هاوکاری و هەماهەنگیی هەموو لایەک، کار بۆ دەستەبەرکردنی مافەکانی زیندانییانی سیاسی بکەین و ببینە دەنگی پەنگخواردووی هەموو ئەو ئازیزانەی کە لە زیندانەکاندا بەرگری لە کەرامەتی ئێمە دەکەن.
لە کۆتاییدا بەڵێن دەدەین کە تا گەیشتن بە ئامانجەکان و ئازادبوونی هەموو زیندانییانی سیاسی، لە سەنگەری بەرگریدا دەمێنینەوە و دەنگی کپکراوی نێو زیندانەکان دەبین. ئەم ڕۆژە پیرۆزە دەرفەتێکە بۆ نوێکردنەوەی پەیمان لەگەڵ گیانی پاکی شەهیدان و ئەو زیندانییانەی کە باشترین ساڵەکانی تەمەنیان لە پێناو ئازادیدا بەخت کردووە.
ئەنجومەنی زیندانییە سیاسییەکانی ڕۆژهەڵاتی کوردستان
دەستەی بەڕێوەبەری
٨ی سەرماوەزی ١٤٠٤ی هەتاوی
٢٩ی نۆڤەمبەری ٢٠٢٥ی زاینیی
