بەپێی ئاماری سەرۆکی پۆلیسی هاتوچۆی ڕێژیم، زیاتر لە ٩٠ لەسەدی ڕووداوەکانی هاتوچۆ لەنێو ڕیگاوبانەکانی ئیران بەهۆی ناستانداردبوونی ماشینی دروستکراوی نێوخۆی ئێرانەوەیە.
ئەحمەد کەرەمی ئەسەد سەرۆکی پۆلیسی هاتوچۆی ڕێژیم بەئاماژەدان بە ڕێژەی گیانلەدەستداوان و چوونەسەرەوەی ئاماری ڕووداوی هاتوچۆ لە ئێران وتوویەتی: "بەهۆی نەبوونی کوالێتیی ماشینەکان، نەبوونی ئیمەنیی تەواو و ناستانداردبوونی ماشینە نێوخۆییەکان زیانێکی زۆری گیانی و ماڵی بەر هاووڵاتییان کەوتووە".
ئەو فەرماندەیەی ڕێژیم باسی لەوە کردووە کە "لە زۆربەی وڵاتانی جیهاندا، ئیمەنیی ماشینەکان بە یەکێک لە سەرەکیترین و گرنگترین پێوەرەکانی هەر ماشینێک بە ئەژمار دێت و پۆلینبەندی بۆ دەکرێت بەڵام لە ئێراندا بە هیچ شێوەیەک بەو شیوەیە پۆلینبەندی نەکراوە و ئەوەش چوونەسەرەوەی ئاماری گیانلەدەستداوان و قوربانییانی ڕووداوی هاتوچۆی بەدواوەیە".
ئەو قسانەی "کەرەمی ئەسەد" لەکاتێکدایە کە پێشتر تەیموور حوسێنی، بەرپرسی پۆلیسی هاتوچۆی فەراجای ڕێژیم هۆکاری ئەم ڕووداوانەی بە گرنگینەدان بە ڕێگای پێشەوە و نەتوانینی کۆنتڕۆڵکردنی ماشین و گۆڕینی کتوپڕی ڕێڕەو و هەڵدێرانی ماشین زانیبوو بەڵام هیچ باسێکی لە خراپیی کوالێتیی ماشینە نێوخۆییەکان و خراپیی دۆخی ڕێگاوبانەکان نەکردبوو.
بەپێی ئاماری ساڵانەی گیانلەدەستداوانی ڕووداوی هاتوچۆ لە ئێران لە ساڵی ١٤٠٣دا، ٢٠ هەزار کەس بەهۆی ڕووداوی هاتوچۆ گیانیان لەدەست داوە کە زیاتر لە ٣ هەزار کەس لەو ڕێژەیە منداڵ بوون.
هەروەها محەممەدڕەزا زەفەرقەندی وەزیری تەندروستیی ڕێژیم لە سیهەمین ساڵوەگەڕی ڕۆژی میللیی تەندروستیی ڕێژیمدا باسی لەوە کردووە کە لە ساڵی ١٤٠٤ی هەتاویدا زیاتر لە ٢٠ هەزار کەس لە ئێراندا بە ڕووداوی هاتوچۆ گیانیان لەدەست داوە.
