بڵاڤۆکی ئێکۆنۆمیست لە دووتوێی ڕاپۆرتێکدا ئاماژەی بەوە داوە کە زۆربەی ئیسرائیلییەکان لەسەر ئەوە باوەڕەن ڕێژیمی کۆماری ئیسلامی بەهۆی ئابڕووی لەدەسچوو و شکستی سەرشۆڕانە و لەناکاوی لە ڕەوتی شەڕی ١٢ ڕۆژەدا، ئەگەری هەیە بچێتە نێو شەڕێکی نوێوە.
بڵاڤۆکی "ئێکۆنۆمیست" ڕاپۆرتێکی نوێی لەبارەی ئەگەری هەڵگیرسانی شەڕێکی دیکە لەگەڵ ڕێژیمی تاران و ڕوانگەکانی خەڵکی ئیسرائیل لەهەمبەر دوورەدیمەنی ئەو ئالنگاری و ململانێیانەی نێوان ئیسرائیل و ڕێژیمی تاران بڵاو کردەوە.
"ئێکۆنۆمیست" لەبارەی ئەو دوو ڕوانگەی خەڵکی ئیسرائیلەوە ئاماژەی بەوە داوە کە لە ڕوانگەی یەکەمدا خەڵکی ئیسرائیل لەسەر ئەو باوەڕەن کە ڕێژیمی کۆماری ئیسلامی بەهۆی ئەوەی لە ڕەوتی شەڕی ١٢ ڕۆژەدا هەموو هەڕەشە و خۆگیڤکردنەوەکانی بوو بە بڵقی سەر ئاو و بە جارێک ئابڕوو و هەیمەنەی کەوتە ژێر پرسیارەوە، دەیهەوێت لە هێرشێکدا هەندێک لەو ئابڕوو و هەیمەنە لەدەستچووەی قەرەبوو بکاتەوە.
هەروەها ئەو بڵاوڤە نووسیویەتی: " خەڵکی ئیسرائیل لە ڕوانگەی دووەمدا لەسەر ئەو بڕوایەن کە ڕێژیمی ئێران بۆ مانەوەی خۆی و بەردەوامبوون لە دەسەڵاتدا، جارێک لە هەوڵی بەهێزکردنەوەی توانا سەربازییە لەنێوچووەکانیەتی و هێزی خۆی لەسەر بەهێزترکردنی هێزی ئاسمانیدا چڕ کردووەتەوە".
بە گوێرەی ڕاپۆرتی بڵاڤۆکی ئێکۆنۆمیست، لە دوورەدیمەنی هەر دوو ڕوانگەدا، ئەگەری شەڕێکی دیکەی نێوان ئیسرائیل و ڕێژیمی ئێران لە ئارادایە و تەنیا پرسیارەکە ئەوەیە کە ئایا زوو ڕوو دەدات یان دێر؟.
هەر لەو پێوەندییەدا ئەو بڵاڤۆکە لە زاری ڕاز زیمت، توێژەری دامەزراوەی ئەمنییەتی میللیی ئیسرائیل لە تێلاڤیڤ بڵاوی کردووەتەوە کە ئێران لە هەوڵدایە حیزبوڵڵای لوبنان سەرلەنوێ پڕ چەک بکاتەوە و ئەرتەشی ئیسرائیل نیگەرانی ئەوەیە کە ڕێژیمی تاران لە گرووپە چەکدارە تێرۆریستییەکانی عێراق بۆ هێرشی مووشکی لەدژی ئیسرائیل کەڵک وەربگرێت وەکوو ئەوەی پێشتر لەلایەن حیزبوڵڵاوە دەیکرد".
