لە کاتێکدا کە هەوڵەکانی دەوڵەتی لوبنان لەهەمبەر چەککردنی حیزبوڵڵا لە ئارادایە، نەعیم قاسم سکرتێری گشتیی گرووپی تێرۆریستیی حیزبوڵڵای لوبنان بە هاوکاریی ڕێژیمی تاران لە هەوڵی نۆژەنکردنەوە و ڕێکخستەنەوەی هێزە لەنێوچووەکانیەتی.
بەپێی ڕاپۆرتی هەواڵدەریی "وای نێت" لەو کاتەوە کە نەعیم قاسم دەسەڵاتی حیزبوڵڵای بەدەستەوە گرتووە گرووپەی لەژێر گوشاری هەمەلایەنانەی ئیسرائیل و دەوڵەتی لوبناندایە و لەکاتێکدا هەوڵە چڕەکان بۆ چەککرانی تەنگی پێهەڵچنیوە، پێداگرە لەسەر ڕێکخستنەوە و نۆژەنکردنەوەی هێز و توانا سەربازی و سیاسییەکانی گرووپەکەی.
"وای نێت" ڕۆژی شەممە ٨ی سەرماوەز بە ئاماژەدان بە هێرشەکانی ساڵی ڕابردووی ئیسرائیل بۆ سەر ئەو گرووپە، ڕێبەران، کەسایەتییە سەرەکییەکانی، ژێرخانەکانی ئەو گرووپە و گوشارە زۆرەکان لەمەڕ چەککردنی حیزبوڵڵا نووسیویەتی: "ئەو گرووپە چەندین جار پێداگریی لەسەر چەک دانەنان کردووەتەوە و بەو ئاسانییە چەک دانانێت".
هەر لەو پێوەندییەدا بەرپرسێکی باڵای دەوڵەتی لوبنان ڕایگەیاندووە: "نەعیم قاسم ڕەنگە کەسایەتییەکی دیار نەبێت و بە بەراورد لەگەڵ حەسەن نەسروڵڵا نەناسراو بێت بەڵام کەسایەتییەکی توندئاژۆی هەیە و ڕوانگەی زۆر لە ڕێبەرانی پێشووتری توندوتیژترە".
شایانی باسە کاناڵی ١٤ی ئیسرائیل لە ڕاپۆرتی بڵاوکردنەوەی کوژرانی هەیسەم عەلی تەباتەبایی دووهەم گەورە بەرپرسی حیزبوڵڵای لوبنان باسی لەوە کردبوو کە ڕێژیمی کۆماری ئیسلامی ڕێکاری نوێی لە بەرانبەر ئیسرائیلدا گرتووەتە بەر و سەرەڕای زیانی قورسی ڕێژیم لە نێوخۆی ئێران و هێزە نیابەتییەکانی، لەسەر پاراستنی هاوسەنگیی هێز و توانا سەربازییەکانی دەستوپێوەندییەکانی لە ناوچەکە بەتایبەت حیزبوڵڵا پێداگرە.
کۆماری ئیسلامیی ئێران وەک پشتیوانی سەرەکیی دارایی و چەکوچۆڵ لە حیزبوڵڵای لوبنان و گرووپە تێرۆریستییەکانی دیکەی ناوچەکە و جیهان لە قەڵەم دەدرێت، ئەو گرووپانە بە بەشێک لە میحوەری مقاومەت لە دژی ئیسرائیل دەزانێت و بە پاڵپشتیی لۆجستیک و ڕاهێنان و هەواڵگری، بەشێک لە توانای سەربازییەکانی خۆی هەتا ئێستا پاراستووە.
