بە گوێرەی ئامارە بڵاوبووەکان، لە مانگی خەزەڵوەری ئەمساڵدا هەڵاوسانی ٤٩.٤ لەسەدیی پێداویستییە خۆراکییەکان لە ئێران گوشاری لەڕادەبەدەری بۆ سەر بنەماڵەکانی ئێران چەند قات کردووەتەوە و کرێکاران و چینی کەمداهاتی کۆمەڵگەی ئێران بەرەو هەژاریی یەکجاری بردووە.
لە ڕاپۆرتی ناوەندی ئاماری ڕێژیم لە مانگی خەزەڵوەری ١٤٠٤ی هەتاویدا ئاماژە بە سێ جۆر هەڵاوسانی خاڵ بە خاڵ، مانگانە و ١٢ مانگە دراوە، لە پێوەری هەڵاوسانی خاڵ بە خاڵدا باس لەوە کراوە کە نرخی هەوڵاوسانی مانگی خەزەڵوەری ئەمساڵ بەنیسبەت مانگی خەڵوەری ساڵی ڕابردوو ٤٩.٤ لەسەد چوونەسەرەوەی بەخۆوە بینیوە و نیوەی زیاتری خەڵکی ئێران توانای کڕینیان لەدەست داوە.
لەو ڕاپۆرتەی ناوەندی ئاماری ڕێژیمدا باس لەوە کراوە مانگی خەزەڵوەر لە بەراوەرد بە مانگی ڕەزبەر ٣.٤ لەسەد هەڵکشانی بەخۆوە بینیوە.
هەروەها باس لەوە کراوە کە زۆرترین هەڵاوسانەکانی بازاڕی ئێران تایبەت بە پێداویستییەکانی خواردن و خواردنەوەیە بە ڕێژەی ٤.٧ لەسەدە و پێداویستییە غەیرە خۆراکییەکانی بە هەڵکشانی ٢.٦ لەسەدی لە پلەی دووهەمدان.
شایانی باسە پێشتریش ناوەندی ئاماری ڕێژیم لە ڕاپۆرتێکدا نیشانی دابوو کە تێچووی دابینکردنی سەوەتەی خۆراکیی ستاندارد بۆ بنەماڵەیەکی چوار کەسی، لانیکەم گەیشتووەتەوە ٦٨.٩ لەسەد و ئەوەش لە کاتێکدایە کە ئەو ڕێژەیە لە مانگی ڕەزبەری ساڵی ڕابردوودا تەنیا ٥٥.٤ لەسەد بووە.
ئامارەکان دەرخەری ئەوەن کە لەژێر سێبەری سیاسەتە ناکارامەکانی ڕێژیمی کۆماری ئیسلامیدا، هەر بنەماڵەیەک زیاتر لە دوو لەسەر سێی داهاتیان بۆ کڕینی پێداویستیی خۆراکی خەرج دەکەن.
کارناسانی ئابووری چوونەسەرەوەی نەختینەیی، بەرز و نزمیی نرخی دراو و گەشەی تێچووی بەرهەمهێنانیان وەکوو سەرەکیترین هۆکاری هەڵاوسان زانیوە بەڵام هاوکات لاوازی و ناکارامەیی وەزارەتی کشتوکاڵی ڕێژیم و دەوڵەتی پزشکییان، گوشارەکانیان بۆ سەر سفرەی خەڵکی ئێران چەند قات زیاد کردووە.
هەر لەو پێوەندییەدا کارناسانی بواری ئابووری لەمەڕ هەڵاوسانی هەوسارپچراو لە ئێران نیگەرانیی جیددیی خۆیان دەربڕیوە و هۆشدارییان داوە بەهۆی کەمبوونەوەی توانای کڕینی پێداویستییە خۆراکییەکانەوە، تەندروستیی گشتیی زۆربەی بنەماڵەکانی ئێران کەوتووەتە مەترسییەوە.
ئەو ئامارەی ناوەندی ئاماری ڕێژیم لەکاتێکدایە کە ئەو ناوەندە هیچکات ئاماری دروست بڵاو ناکاتەوە و کارناسانی باس لەوە دەکەن هەڵاوسان و گرانی زۆر لەو ڕێژەیەی کە ئەو ناوەندەی ڕێژیم بڵاوی کردووتەوە، کارەساتبارتر و زیاترە.
