سێیەمین کۆڕەشێعری "وێرەکانی خەزەڵوەر" بە بەشداریی شاعیران، هۆگرانی هونەر و وێژەی کوردی، دڵسۆرانی ئەدەبیاتی کوردی، نووسەران و خەڵکی هونەردۆستی بانە و بە خانەخوێی ئەنجومەنی ئەدەبیی بانە بەڕێوە چوو.
شەوی پێنجشەممە ٦ی سەرماوەز، به بەشداریی بەرچاوی هۆگرانی ئەدەبییاتی کوردی، نووسەران، دڵسۆزانی نیشتمان و ۲٨ شاعێر لە شارەکانی ڕوانسەر، سەرپێڵ زەهاو، کرماشان، مەریوان، سەردەشت، بۆکان و بانە لە هوڵی مەکۆی فەرهەنگیی هونەریی شاری بانە لە چوار پانێلدا بەڕێوە چوو.
سەرەتای کۆڕەکە بە شمشاڵ و سروودی "خوایە وەتەن ئاوا کەی" دەستی پێ کرد و دواتر بەرپرسی ئەنجومەنی ئەدەبیی بانە لە وتارێکدا سپاس و پێزانینی خۆی ئاراستەی بەشداربووان کرد و پەیمانی برایەتی و چالاکی زیاتر لەهەمبەر خاک و نیشتمانی لەپێش چاوی بەشداربووان نوێ کردەوە و پەیمانی دا لە ڕێبازی خزمەت بە ئەدەبیات و کولتووری کوردیدا بێوچان هەڵگری مەشغەڵی خزمەتگوازی بن.
لە بڕگەیەکی دیکەدا "جەلال شەشەیی" گۆرانییەکی پێشکەشی ئامادەبووان کرد.
جێی ئاماژەیە لەم کوڕەدا ڕێز لە چەندین کەسایەتیی ئەدەبی وەک مامۆستا "ئەمین گەردیگلانی"، خاتوو "لەیلا بەهرام بەیگی" چالاکی بواری منداڵان و مامۆستا "سەعید نەجاڕی" گیرا.
لە بڕگەیەکی دیکەی کۆڕەشێعری "وێرەکانی خەزەڵوەر"دا، هەوڵ و ماندووبوونی کارگێڕی گشتیی سێهەمین کۆڕەشێعری وێرەکانی خەزەڵوەر و دەستەی کارگێڕی ئەنجومەنی ئەدەبیی بانە کە لە پۆلێک گەنجی تازە پێگەیشتوو و لێهاتوو پێک هاتووە بەرز نرخێندرا.
لە دوای ئەو بڕگەیەدا، مامۆستا "عەلی فرووتەن" و مامۆستا "ڕێزان" لە بۆکانەوە بە گۆرانی و حەیران ئەو کۆڕەیان ڕازاندەوە.
هەروەها لەم کۆڕەدا، کەسایەتییە دیارەکانی کوردستان وەک مامۆستا "مستەفا ئیلخانیزادە" مامۆستای زمانی کوردی، مامۆستا "هێرش بێتووشی" مامۆستای زمان، وەرگێڕ، شاعیر و بەرپرسی ئەنجومەنی سەردەمی سەردەشت، مامۆستا "شەماڵ ئیسماعیلپوور" مامۆستای زانکۆ و زمانی کوردی و شاعێر، حاجی "عێزەتوڵڵا حەمزە" شاعیر و دڵسۆزی ئەدەبیاتی کوردی، "حەسەن دەروێش" پارێزەر، شاعیر، نووسەر و چالاکی ژینگەیی و دەیان کەسایەتیی دیار و بەرچاوی ڕۆژهەڵاتی کوردستان بەشدار بوون.
شایانی باسە بە پێشکەشکردنی سپاسنامە و خەڵات بە سەرجەم بەشداربووان و یارمەتیدەرانی پێکهێنانی سێیەمین کوڕەشێعری "وێرەکانی خەزەڵوەر"، کۆتایی بەو کۆڕەشێعرییە هات.
