لە هێرشی دڕۆنیی ئامریکا بۆ سەر ئەندامانی گرووپی ئەلقاعیدە لە ڕۆژهەڵاتی مائرەبی یەمەن، دوو ئەندامی ئەو گرووپە لەوانەش فەرماندەیەکی باڵا کوژراوە.
هەواڵدەریی "ئەلعەرەبییە" لە دووتوێی ڕاپۆرتێکدا بڵاوی کردەوە کە لە ڕەوتی هێرشی دڕۆنیی ئەمریکا بۆ سەر ئەندامانی گرووپی ئەلقاعیدە، "مونیر بۆجەیلی ئەلهۆدەل" ناسراو بە ئەبوو ئەلهەیجا ئەلحەدیدی بەرپرسی فەرماندەیی سەربازیی ئەو گرووپە کراوەتە ئامانج و کوژراوە.
شایانی باسە کوژرانی "ئەبوو ئەلهەیجاولحەدیدی" لەلایەن ئەلقاعیدە و چەند سەرچاوەیەکی دیکەوە پشتڕاست کراوەتەوە.
ئەلعەرەبییە لەو ڕاپۆرتەدا ئاماژەی بەوە داوە کە "مونیر بۆجەیلی ئەلهۆدەل" بە یەکێک لە باڵاترین فەرماندە سەربازی و مەیدانییەکانی گرووپی تێرۆریستیی ئەلقاعیدە بە ئەژمار دەهات و فەرماندەیی بەرەکانی شەڕ لە پارێزگاکانی "ئەلبەیزا"، "ئێب"، "شەبوە"، "ئەبەین" و "لۆجێحـ"ـی لە ئەستۆ بووە.
شایانی باسە ئەو فەرماندە باڵایەی ئەلقاعیدە لە ئۆپەراسیۆنە تێرۆریستییەکانی ئەو گرووپە لە شوێنە جیاوازەکانی یەمەن ڕۆڵی سەرەکیی بووە.
لە ماوەی ساڵانی ڕابردوودا ئەمریکا بەشێوەی بەردەوام دەیان هێرشی بۆ سەر ئەو گرووپە توندئاژۆ ئایینییەی سەر بە ڕێژیمی ئێران بەڕێوە بردووە و زیانی زۆری مادی و گیانی پێ گەیاندووە.
پێشتریش وەزارەتی دەرەوەی ئەمریکا لە وتووێژێکدا ڕاگەیاندبوو کە: کۆماری ئیسلامی لانیکەم لە ساڵی ٢٠٠٩ـەوە ڕێگەی بە ڕێکخراوی ئەلقاعیدە داوە کە لە ڕێگەی هێڵێکی سەرەکیی پێوەندی لە ڕێگەی ئێرانەوە کارئاسانی بۆ چالاکییە تێرۆریستییەکانی بکات، هەروەها پارە و چەکدارەکانی خۆی بەرەو باشووری ئاسیا، سووریە و شوێنەکانی تر بگوازێتەوە.
وەزارەتی دەرەوەی ئەمریکا چەندین جار لەسەر ئەوە پیداگر بووە که کۆماری ئیسلامی له دابینکردنی پەناگەیەکی ئارام بۆ سەرکرده باڵاکانی ئەلقاعیده له ئێران بەردەوامه و سەرەڕای ئاگاداربوون لە چالاکیی ڕێبەرانی ئەلقاعیدە، ڕێژیمی ئێران هەبوونی ئەوان لە وڵاتەکەیان ڕەت دەکەنەوە.
ئەلقاعیدە ڕێکخراوێکی بناژۆخوازی ئیسلامییە کە ساڵی ١٩٨٨ بۆ شەڕ دژی سۆڤیەت لە وڵاتی ئەفغانستان دامەزرا. ئەو ڕێکخراوەیە کە ئەمریکا و ئیسرائیل بە دوژمنی ھاوبەشی ھەموو موسوڵمانان دەزانن و وەک خۆیان دەڵێن بۆ پێشگرتن لە دەستێوەردانەکانی جیهانی ڕۆژاوا لە دنیای ئیسلام دەست دەدەنە کاری تیرۆریستی و توندئاژویانە.
