ئەندامانی ئەنجومەنی "سەوزی چیای مەریوان" بە هاوکاریی خەڵکی ژینگەدۆستی ئەو شارە، لە بەرەبەری گەڕانەوەی باڵندە کۆچەرییەکان و دەسپێکی وەزری سەرما، وەکوو ساڵانی ڕابردوو هەڵمەتی خاوێنکردنەوەی گۆلی زرێباریان بەڕێوە برد.
لە ماوەی ڕۆژانی ڕابردوودا ئەنجومەنی سەوزی چیای مەریوان لە بانگەوازێکدا داوای لە ئەندامانی خۆی و خەڵکی ژینگەپارێزی مەریوان کرد کە ڕۆژی پێنجشەممە ١٥ی خەزەڵوەری ١٤٠٤ لە هەڵمەتی خاوێنکردنەوەی لێواری زرێباردا بەشدار بن.
شایانی باسە لەو هەڵمەتە ژینگەییەدا، ژینگەپارێزانی شاری مەریوان بەتایبەت لاوان و ئەندامانی ئەنجومەنی سەوزی چیا، پێشوازییەکی گەرمیان لەو هەڵمەتە ژینگەپارێزییە کردووە و لێوارەکانی ئەو گۆلەیان خاوێن کردووەتەوە.
جێگای باسە ئەندامانی سەوزی چیا پێش بارینی باران و هاتنی وەرزی زستان ئەو چالاکییەیان بەڕێوە بردووە و کەنارەکانی گۆلی زرێباریان لە زبڵ و خاشاک خاوێن کردووەتەوە.
"ئەنجومەنی سەوزی چیا" لەوبارەوە ڕایگەیاندووە: ''لەپێناو هەست بە بەرپرسایەتی لەهەمبەر ژینگە و بەتایبەت پێویستیی پاراستنی پەنگاوی زرێبار و سەرکۆنەی ڕاوی پەلەوەر و گرنگیی پەلەوەرە کۆچەرییەکان بۆ زرێبار و دانیشتووانی دەوروبەری ئەم پەنگاوە کە دەورێکی تایبەتی بۆ گەشەی ئابووریی ناوچە و ڕاکێشانی گەشتیار هەیە، هەستاوە بە جێبەجێکردنی ئەم ئەرکە گرنگە".
شایانی باسە ئەنجومەنی سەوزی چیا هەموو ساڵێک لەم وەرزەدا بە بەڕێوەبردنی دوو بەرنامە؛ یەکەم خاوێنکردنەوەی دەوروبەری زرێبار و دووهەم خاوێنکردنەوەی ژینگەی پەلەوەرە کۆچەرییەکان، ئەرکی ژینگەپارێزیی خۆی بەڕێوە دەبات و پێشوازی لەو کۆچەرییانە دەکات.
جێی ئاماژەیە بەرنامەی یەکەمی خاوێنکردنەوەی دەورووبەری زرێبار، لە ڕۆژی ٢٧ی ڕەزبەری ١٤٠٢ی هەتاوی لە ڕوژاوای زرێبار بەڕێوە چوو.
