بە پێی ئامارەکانی ڕێژیمی کۆماری ئیسلامی، زیاتر لە ١٨ هەزار و ٨١١ قوتابی لە پارێزگای سنە بە هۆی دەسکورتی و هەژاری لە خوێندن دوور کەوتوونەتەوە کە لەو ڕێژەیە ٢ هەزار و ٣٧٦ قوتابی لە قۆناغی سەرەتایی و زیاتر لە ١٦ هەزار قوتابی لە قۆناغی دواناوەندی دەستیان لە خوێندن هەڵگرتووە.
لەو پێوەندییەدا" محەممەد جەعفەر قایم پەنا" جێگری ئیجرائیی سەرۆککۆماری ڕێژیم بە ئاماژە بەو ئامارانە ڕایگەیاند کە زیاتر لە ٢٥٦ هەزار کەس لەم پارێزگایە نەخوێندەوارن و ئەو پارێزگایە بۆ قوتابخانەکان پێویستی بە ٣ هەزار مامۆستایە.
هەژاریی بنەماڵەکان، زیادکردنی تێچووی خوێندن و هەروەها گوشارەکان و سنوورداربوونی بنەماڵەکان بووەتە هۆی ئەوەی کە زۆربەی قوتابییان بە ناچاری لە خوێندن دوور بکەونەوە.
لە ساڵی ١٤٠٣دا لە ئێران، زیاتر لە ٣ میلیۆن قوتابی لە خوێندن دوور کەوتوونەتەوە کە هۆکاری سەرەکیی ئەم دوورکەوتنەوەیە هەژاری و ئەو سنوورداربوونانەیە کە بەسەر بنەماڵەکاندا سەپێندراوە.
