لە درێژەی هەوڵە ژینگەوانییەکان و پەرەپێدان بە کلتووری پاراستنی سروشت لە ڕێگەی چاندی نەمام و دەنکە بەڕوو، لە زۆربەی ناوچەکانی ڕۆژهەڵاتی کوردستان لەوانەش سەلاسی باوەجانی، گیەڵان و زۆرێک لە ئاواییەکانی شاری مەریوان و تەنانەت شارەکانی هەرێمی کوردستانیش هەڵمەتی زاگرۆسانە بەڕێوە چووە.
بەپێی ڕاپۆرتی ئەنجومەنی سەوزی چیای مەریوان، لە ماوەی ڕۆژانی ڕابردوودا هەڵمەتی زاگرۆسانە لە ئاواییەکانی نێزڵ، گوڵچێر و نێ و چەند ئاواییەکی دیکەی مەریوان بە بەشداریی ئەندامانی ئەنجومەن و خەڵکی ژینگەپارێزی هەرکام لەو ئاواییانە بەڕێوە چووە.
بەپێی ئەو ڕاپۆرتە، ڕۆژی دووشەممە ١ی بەفرانبار، ئەندامانی سەوزی چیای مەریوان لە هەڵمەتی ژینگەوانیی زاگرۆسانە لە ئاوایی "گوڵچێر" سەر بە ناوچەی سەرشیوی مەریوان و بە هاوکاریی خەڵکی نیشتماندۆستی ئەو ئاواییە سەدان نەمام و دەنکە بەڕوویان چاند و پێداگرییان لەسەر پەرەپێدانی کلتووری نەمام چاندن و ڕێزگرتن لە سروشت کردەوە.
لەو هەڵمەتەدا، چەندین کەسایەتی و ئەندامانی ئەنجومەنی سەوزی چیای مەریوان لەسەر چۆنیەتیی چاندنی نەمام و دەنکە بەڕووەکان بەرچاوڕوونیان بە بەشداربووان دا و دواتر لە کەشێکی هاوڕێیانەدا دەستیان بە هەڵمەتەکە کرد.
شایانی باسە لە ئاوایی گوڵچێردا، پێشتریش چەند هەڵمەتی جۆراوجۆری ژینگەوانیی بەرچاو بەڕێوە چووە و لەم هەڵمەتەشدا زۆرێک لە لاوانی ئەو ئاواییە بەشداریی چالاکانەیان هەبووە.
هەروەها لە ئاوایی "نێ"شدا هەڵمەتی زاگرۆسانە بە گڕوتێنێکی زۆرە و بە بەشداریی خەڵکی ژینگەپارێزی ئەو دەڤەرە و لەژێر ڕێنوێنیی ئەندامانی سەوزی چیادا هەڵمەتی زاگرۆسانە بەڕێوە چوو.
لەو هەڵمەتەدا چەندین پارچە شێعر و سروودی حەماسی وترانەوە و بە گەرمی پێشوازی لە هەڵمەتی زاگرۆسانەی ئەمساڵ کرا.
هەروەها لە ئاوایی "نیزڵ" سەر بە شاری مەریوان هەڵمەتی زاگرۆسانە بە شێوەی بەرچاو و بەربڵاو بەڕێوە چوو و بە چاندی نەمام و دەنکە بەڕوو پێداگرییان لەسەر پەرەپێدانی دارستان و لێڕەوارەکان کردەوە.
لە شاری بانە بۆ دووهەم جار هەڵمەتی زاگرۆسانە بە دەسپێشخەریی ئەنجومەنی پارێزەرانی ژینگە "پاژین ـــ بانە" و بە بەشداریی کۆمەڵانی خەڵکی ئەو شارە بەڕێوە چووە و چەندین جۆر دەنکە بەڕوو، نەمام، دەنکە قەزوان و گۆیژ چێندرا.
هەروەها لە شاری سەلاسی باوەجانیش هاوشێوەی شار و ناوچەکانی دیکەی کوردستان هەڵمەتی زاگرۆسانە بە دەسپێشخەریی ئەنجومەنە ژینگەپارێزی و گرووپە شاخەوانییەکانی ئەو شارە بەشێوەی گەرموگوڕ بەڕێوە چوو.
هەروەها لە کاناڵی تێلێگرامیی ئەنجومەنی سەوزی چیادا ئاماژە بە بەڕێوەچوونی هەڵمەتی زاگرۆسانە لە شاری گیەڵانی سەر بە کرماشان کراوە و لەلایەن خەڵکی ژینگەپارێزی ئەو شارەوە پێشوازییەکی باش لەو هەڵمەتە کراوە.
هەروەها پێشتریش لە هەرکام لە شارەکانی جوانڕۆ، سنە، پاوە، بانە، ڕوانسەر، سەقز، کرماشان، باینگان، بانەوڕێ، مەریوان و دەیان شار و ئاوایی دیکەی ڕۆژهەڵاتی کوردستان هەڵمەتی ساڵانەی زاگرۆسانە بەڕێوە چووە.
شایانی باسە هەڵمەتی زاگرۆسانە شارەکانی هەرێمی کوردستانیشی گرتووەتەوە و لە شاری شەقڵاوە و قەڵادزێ و چەندین ناوچەی دیکەدا ئەو هەڵمەتە بەڕێوە چووە.
