ڕێوڕەسمی بەخشینی مافی هاووڵاتیبوونی ئیفتخاریی شاری پۆجیبونسی ئیتالیا بە وریشە مورادی، بەندکراوی سیاسی مەحکووم بە سێدارە لە بەندیخانەی ئێڤین، ڕۆژی ١٠ی سەرماوەزی ١٤٠٤، بە بەشداریی شارەدار و ئەندامانی شۆرای ئەم شارە و کۆمەڵێک لە هاووڵاتییان بەڕێوە چوو.
ئەم ڕێوڕەسمە لە هۆڵی سەرەکیی شارەداریی ئەم شارە بەرێوەچووە.
سوزانا چنی شارداری پۆجیبونسی، نوێنەرانی شۆرای شار و زیاتر لە سێسەد کەس لە هاووڵاتییان بەشدارییان لەم ڕێورەسمەدا کردووە.
شیوا مەحبووبی لە وتەبێژانی کەمپەینی ئازادیی وریشە مورادی وەک نوێنەر لەلایەن بنەماڵە و لایەنگرانی ناوبراوەوە بەشداریی ئەم ڕێوڕەسمەی کرد و لەوحی هاووڵاتیبوونەکەی نوێنەرایەتی لە وریشە مورادی لەم ڕێوڕەسمەدا وەرگرت.
مەحبووبی لە قسەکانیدا وێڕای پێزانین بەرانبەر بە شارەوانیی پۆجیبونسی ئەم هەوڵەی بە نیشانەی یەکگرتوویی مرۆڤانە و سەرنجی کۆمەڵگەی جیهانی بە چارەنووسی بەندکراوە سیاسییەکان زانی و سپاسی بەڕێوەبەران وهاووڵاتییانی بەشداربووی ئەم ڕێوڕەسمەی کرد.
لەم ڕێوڕەسمەدا سوزانا چنی شارەداری پۆجیبونسی، لە قسەکانی خۆیدا باسی لە چالاکیی مرۆڤانە و هەوڵەکانی وریشە بۆ پارێزگاری لە گیانی مرۆڤەکان کرد.
وریشە مورادی بەندکراوی سیاسیی خەڵکی شاری سنە و بەندکراو لە زیندانی ئێڤین لەلایەن لقی ١٥ی دادگای ئینقلابی ڕێژیمەوە لە تاران بە تۆمەتی بەغی لە ڕێگەی ئەندامەتی لە یەکێک لە حیزبە کوردستانییەکانی دژی ڕێژیمی ئێران بە سێدارە مەحکووم کراوە.
