ڕۆژی دووشەممە ١٤ی بەفرانباری ١٤٠٤، كاک محەممەدعەلی پەیغامی موانە كەسایەتیی نیشتمانپەروەری خەڵكی شنۆ لە تەمەنی ٨٢ ساڵیدا و بەهۆی نەخۆشییەوە لە شاری شنۆ كۆچی دوایی كرد.
كاک محەممەدعەلی لە ئاوایی موانە سەر بە ناوچەی تەرگەوەڕ لەدایک بووە و چەند ساڵێک لە گوندەكانی موانە و دۆستەک ژیاوە و دوای ڕاپەڕینی گەلانی ئێرانیش بە یەكجاری لە شاری شنۆ نیشتەجێ بووە.
ناوبراو وێڕای ئەوەی لە بنەماڵەیەكی نیشتمانپەروەرە، لە كەسایەتییەكی خۆشناو و ڕێزداری ناوچەكانی ورمێ، ترگەوەڕ و دەشتەبێڵ و شاری شنۆ بوو، هاوكات دۆست و لایەنگرێكی دڵسۆز و خەمخۆری حیزبی دێموكرات و هێزی پێشمەرگەی كوردستان بەتایبەتی لە ساڵانی دەیەی ٦٠ی هەتاویدا هاوكارێكی ماندوونەناسی كادرەكانی حیزب لە دەڤەری شنۆ بوو.
كاک محەممەدعەلی بەردەوام هانی خزم و ناسیارانی دەدا تا لە ڕێبازی كوردایەتی دانەبڕێن و لە تێكۆشانی خۆنەویستانە درێغی نەكەن.
ناوبراو هەتا دوایین ساتەکانی ژیانی شانازیی بە ڕێبازی حیزبی دێموكراتەوە دەكرد و بە ئامانج و ئاواتی شەهیدان وەفادار بوو و پشتیوانی هێزی پێشمەرگەی كوردستان بوو.
تەرمی ناوبراو ئێوارەی هەمان ڕۆژ لەنێو ئاپۆرای خەڵکدا لە گۆڕستانی ئاوایی نەڵیوان سەر بە شاری شنۆ بەخاک سپێردرا.
ناوەندی ڕاگەیاندنی حیزبی دێموکراتی کوردستانی ئێران بەو بۆنەوە سەرەخۆشی لە بنەماڵە، خزم و کەسوکاری ناوبراو دەکات و خۆی بە هاوبەشی خەمیان دەزانێت.
