مای ساتۆ ڕیپۆرتێری تایبەتی ڕێکخراوی نەتەوە یەکگرتووەکان بۆ کاروباری مافی مرۆڤی ئێران لە وتووێژێکدا لەگەڵ کاناڵی ئەی بی سی لەبارەی تاوانە دژەمرۆییەکانی ڕێژیمی کۆماری ئیسلامی هاتە دەنگ و ڕایگەیاند: "زۆربەی کوژراوانی ناڕەزایەتییەکانی ئێران بە تەقەی ڕاستەوخۆی هێزە چەکدارەکانی کۆماری ئیسلامی کوژراون".
مای ساتۆ پێداگریی لەسەر ئەوە کردەوە کە ئەوەی لە ئێران ڕوو دەدات تاوان دژی مرۆڤایەتییە و بۆ بەدواداچوون بۆ ئەو تاوانانە پێویستی بە توێژینەوەیەکی سەربەخۆیە.
ڕیپۆرتێری تایبەتی ڕێکخراوی نەتەوە یەکگرتووەکان بۆ کاروباری مافی مرۆڤی ئێران ئاماژەی بەوە داوە کە بەهۆی پچڕانی ئینتێرنێتەوە، زانیاریی لەبارەی ڕێژەی ڕاستەقینەی کوژراوان و پێشێلکارییە مافی مرۆییەکان لەلایەن ڕێژیمی کۆماری ئیسلامییەوە و ڕاستیدۆزی لەوبارەوە زۆر دژوار بووە.
پێشتریش مای ساتۆ چەندین جار لەبارەی پێشێلکارییە مافی مرۆییەکانی ڕێژیمی تارانەوە هۆشداریی جیددی دابوو و لەو بارەوە نیگەرانیی خۆی دەربڕیوە.
