ڕێکخراوی لێبوردنی نێونەتەوەیی، ڕۆژی سێشەممە ٦ی ژانویەی ٢٠٢٦، لە ڕاگەیاندراوێکدا، هێرشی هێزەکانی سپا و یەکە تایبەتییەکانی کۆماری ئیسلامیی بۆ سەر نەخۆشخانەی خومەینی لە ئیلامی بە "پێشێلکارییەکی ئاشکرای یاسا نێودەوڵەتییەکان" ناساند. هێزەکانی ڕێژیم بە گازی فرمێسکڕێژ، تەقەکردن و چوونە ژورەوە بۆ نەخۆشخانە، هێرشیان کردووەتە سەر نەخۆش و بریندار و کارمەندانەکانی نەخۆشخانەکە و بەشێکی ناڕازییان و ئەندامانی بنەماڵەکانیان دەسبەسەر کردوون.
ڕێکخراوی لێبوردنی نێودەوڵەتی داوای لە کاربەدەستانی کۆماری ئیسلامی کرد، دەست لە بەکارهێنانی هێز دژی خۆپیشاندەران هەڵ بگرن و دەسبەسەرکراوانیش ئازاد بکەن، هەروەها گەرەنتیی مافی چارەسەرکردنی برینداران بکەن. ئەم ڕێکخراوە جەختی کردوەتەوە، کە هێرشکردن بۆ ناوەندە دەرمانییەکان و دەسبەسەرکردنی ئەو کەسانەی داوای چارەسەر دەکەن، پێشێلکردنی بنەما بنەڕەتییەکانی یاسای نیودەوڵەتییە و پێویستە حکوومەت لێپرسینەوەی لێ بکرێت.
ناڕەزایەتییەکانی ئیلام لەم چەند ڕۆژەی ڕابردوودا، بەشێک لە شەپۆلی بەربڵاوی ناڕەزایەتییەکان لە دژی گەندەڵی، ناکارامەیی و قەیرانی ئابووری بووە، کە لەو چەند ڕۆژەی ڕابردوودا بەرەوڕووی سەرکوتی توندوتیژانەی هێزە ئەمنییەتییەکان بووەتەوە، کە بە هۆیەوە چەندین کەس کوژراون و دەیان کەسیش بریندار بوون.
