بەرپرسانی ناوخۆیی تەندروستی لە شاری کۆبانی لە ڕۆژاوا، هۆشدارییان دا کە دۆخی تەندروستیی گشتی بەهۆی بەردەوامیی گەمارۆدانی شارەکە خراپە و ڕایانگەیاندووە کە کۆگاکانی دەرمان تەنها بۆ ماوەی حەفتەیەکی تر بەشی پێداویستییەکان دەکەن.
ئەحمەد مەحموود، هاوسەرۆکی دەستەی تەندروستیی کۆبانی، ڕۆژی سێشەممە ٢١ی ڕێبەندان بە ئاژانسی هەواڵی "ڕووداو"ی ڕاگەیاند کە سەدان کەس لە دانیشتووانی کۆبانی بەهۆی بەکارهێنانی ئاوی پیس تووشی نەخۆشی بوون.
بە وتەی ئەو، لانیکەم ٥٠٠ کەس بە نیشانەکانی وەک سکچوون، ڕشانەوە و ژەهراویبوون بەهۆی ئاوی پیسەوە سەردانی ناوەندە تەندروستییەکانیان کردووە.
بە وتەی بەرپرسانی ناوخۆیی، کۆبانی زیاتر لە سێ حەفتەیە لەژێر گەمارۆدایە؛ ئەمە لەکاتێکدایە کە لە کۆتاییی مانگی ژانوییەدا، ڕێککەوتنێک لە نێوان "هێزەکانی سووریەی دێموکرات" و حکوومەتی کاتیی سووریە بۆ ڕاگرتنی شەڕ ڕاگەیەندرا، بەڵام سنووردارکردنی هاتوچۆ و داخستنی ڕێگاکانی هاوکاری هێشتا بەردەوامە.
بڕانی درێژخایەنی ئاو و کارەبا قەیرانەکەی قورستر کردووە. هەرچەندە کارەبا دوای زیاتر لە ٢٠ ڕۆژ بۆ چەند کاتژمێرێک هاتەوە، بەڵام ئاو هێشتا بڕاوە و ڕێگاکانی گەیاندنی کاڵا و پێداویستییەکان نەکراونەتەوە.
لە ئێستادا پێنج نەخۆشخانە لە ناو شاردا کار دەکەن، بەڵام زیادبوونی ژمارەی نەخۆشەکان و ئاوارەکان، گوشارێکی زۆری خستووەتە سەر توانای ئەم ناوەندانە.
کەمیی کەلوپەلی نەشتەرگەری، پێداویستیی تاقیگە و دەرمانە تایبەتەکان، لەوانە دەرمانی دژە هاربوونی سەگ، وەک هەڕەشەکانی بەردەم کەرتی تەندروستی ئاماژەیان پێ کراوە.
بەرپرسانی ناوخۆیی هۆشداری دەدەن کە ئەگەر گەمارۆکە بەردەوام بێت و هاوکاریی پزیشکی بەپەلە نەگات، دۆخەکە بەرەو قەیرانێکی مرۆییی بەرفراوانتر هەنگاو دەنێت.
