منداڵێکی ١٣ ساڵان بە ناوی "ڕەحیم حەمیدی" بە هۆی تەقینەوەی مین لە ناوچەی "چەم هێندی"ی شاری دێهلوڕان گیانی لەدەست دا.
ئەم ڕووداوە ڕۆژی سیشەممە ڕووی داوە و ئەم منداڵە سەرەڕای هەوڵەکانی تیمەکانی فریاکەوتن، بە هۆی سەختیی برینەکانییەوە گیانی لەدەست داوە.
ئێران بۆ ماوەی چوار دەیەیە کە دووەمین وڵاتی ئالوودە بە مین لە جیهانە و بە وتەی بەرپرسانی کۆماری ئیسلامی زیاتر لە ٨٠ لەسەدی ئەم زەوییانە خاوێن کراونەتەوە.
ئەحمەد وەحیدی وەزیری بەرگریی کۆماری ئیسلامی لە ساڵی ١٣٩٠دا ڕایگەیاند، نزیکەی چوار میلیۆن و ٢٠٠ هەزار هێکتار لە زەوییەکانی پێنج پارێزگای ورمێ، سنە، کرماشان، ئیلام و خووزستان مینیان تێدا چیندراوە.
٨٠ لەسەدی قوربانییانی تەقینەوەی مین و ماددە تەقەمەنییەکان، هاووڵاتییانی سێڤیل بوون.
ئالوودەبوونی ئەم پارێزگایانە بە نزیکەی ٢٠ میلیۆن جۆری مین و تەقینەوە، لە درێژەی شەڕی ئێران و عێراقدا و هەروەها مینە دژەنەفەرە چێندراوەکان لە سەرەتاکانی دەیەی ٦٠ی هەتاوی بووە.
