شۆرای هاواهەنگیی ڕێکخراوە سێنفییەکانی فەرهەنگییانی ئێران لە بەیاننامەیەکدا پشتیوانیی لە مانگرتن و ماتەمینی گشتیی خوێندنگەکانی ئێران کرد.
ئەم ماانگرتن و ماتەمینییە بە نیشانەی ناڕەزایەتی و ماتەمینی بۆ قوتابییانی شەهیدکراو بڕیارە لە ٢٩ی ڕێبەنداندا بەڕێوە بچێت.
لە بەیاننامەی ئەو شۆرایەدا کە ڕۆژی دووشەممە ٢٧ ڕێبەندان بڵاو بوویەوە، بە پێداگرییەوە هاتووە: "ئێمە ڕێگە نادەین پۆلەکان و شەهیدکرانی قوتابییان ئاسایی نیشان بدرێت و ئەمنییەت، کەرامەت و مافی ژیانی قوتابییان پشتگوێ بخرێت".
لەو بەیاننامەدا ئاماژە بە شەهیدبوونی ٢٣٠ قوتابی کراوە.
ئەو شۆرایە داوای لە مامۆستایان کردووە بە نیشانەی ناڕەزایەتی و ماتەمین لە ڕۆژی ٢٩ی ڕێبەنداندا نەچنە پۆلەکان و داواش لە باوکان و دایکان کراوە لەو ڕۆژەدا منداڵەکانیان نەنێرنەوە خوێندنگەکان.
ڕۆژی یەکشەممە ٢٦ی ڕێبەندان چەندین ڕێکخراوی خوێندکاری و خوێندکارانی دەیان زانکۆ لە سەرانسەری ئێران لە بەیاننامەیەکی هاوبەشدا و لەژێر ناوی "بانگەوازی خوێندکاری بۆ هاوپێوەندی لەگەڵ بنەماڵە مافویستەکان"، خوازیاری مانگرتن و ماتەمینیی گشتی لە ڕۆژانی ٢٨ و ٢٩ ڕێبەندان بوون.
لەو بەیاننامە هاوبەشەدا هاتووە کە "بە بەڕێوەبردنی مانگرتنێکی گشتی و داخستنی شوێنی کار و خوێندنگاکان، هاودڵیی خۆیان بەکردەوە لەگەڵ بنەماڵەی قوربانییان دەرببڕن. ئێمە وەک خوێندکاران، بە بەڕێوەبردنی ڕێوڕەسمی ڕێزگرتن لە خوێندکاران و خەڵکی گیانبەختکردوو لە زانکۆ و شوێنە گشتییەکانی دیکە، یادی ئازیزانمان بەرز ڕادەگرین و لەگەڵ بنەماڵەکانیاندا هاودڵی دەکەین".
