ڕۆژی چوارشەممە ١٥ی ڕێبەندانی ١٤٠٤، کاک سیامەک ئەنساریان، ئەندامی حیزبی دێموکراتی کوردستانی ئێران، لە تەمەنی ٦٤ ساڵیدا و لە هەڵەبجە کۆچی دوایی کرد.
کاک سیامەک ئەنساریان لە شاری مەهاباد لە دایک بووە و هەر لە تەمەنی لاویەتیدا، بە ڕۆحی ئازادی و سەربەستی و مافی نەتەوەیی، خەبات و تێکۆشانی خۆی دەستی پێکرد و لە سەرەتای شۆڕشی گەلانی ئێراندا بە دژی ڕێژیمی شا چالاک بوو. دوای شۆڕش، بوو بە ئەندامی ڕێکخراوی لاوانی دێموکرات و بۆ ئامانجەکانی حیزبی دێموکراتی کوردستانی ئێران تێکۆشانی دەست پێکرد.
ناوبراو دوای شيهیدبوونی برایەکی لە ڕێزەکانی حیزبی دێموکراتدا، کەوتە ژێر گوشاری ڕێژیم و ناچار بوو دوور لە بنەماڵەکەی، لە شارهکانی تاران و تەورێز ژیانی خۆی بەردەوام بکات.
کاک سیامەک کوشتیگیرێکی ناودار بوو و لە مەهاباددا سالۆنێکی کوشتیی دامەزراند. بەهۆی ئەخلاقی ئارام و هەڵسوکەوتی باشی، متمانەی زۆری پێ دەکرا و هەمیشە لە کارەکانیدا سەرکەوتوو بوو.
دوای شههید کرانی دکتور قاسملوو و هاوڕێیانی، لەگەڵ تەشکیلاتی نهێنیی حیزبی دێموکرات تێکۆشانی دەست پێکرد. دوای کۆنگرەی نۆیەمی حیزب، پەیوەندییەکی نزیکتری لەگەڵ سکرتاریای حیزب و شههید دکتور سەعید هەبوو و بۆ کاری نهێنی چەندین ئەرک و پێشنیاری پێ سپێردرا. لە کارە گرنگەکانی، پێوەندیگرتن لەگەڵ خوێندکاران، هونەرمەندان، نووسەران و ڕۆژنامەوانان، چالاکییەکانی تەبلیغاتی و دیوارنووسی و بڵاوکردنەوەی تراکت و هەروەها ناردنی ڕۆژنامەکانی کەیهان، ئیتلاعات و سەلام بۆ ڕێبەریی حیزب ڕۆڵی بوو کە جێی سەرنجی تایبەتی دکتور سەعید بوو.
دوای کارەساتی میکۆنۆس، تیمی تەشکیلاتی نهێنی لەگەڵ کاک سیامەکدا لە داخستنی دووکان و بازاڕەکانی شاری مەهاباد چالاکییەکی بەرچاویان هەبوو کە کاریگەری گرنگی هەبوو. بەدوای ئەم چالاکییانەدا، کاک سیامەک کەوتە ژێر گوشاری ڕێژیم و ناچار بوو لە پاییزی ١٣٧١ی هەتاوی شار و زێدی خۆی بەجێ بهێڵێت و ڕێگەی هەندەران بگرێتە بەر. سەرەتا چوو بۆ تورکیە و دواتر لە ئەیالەتی کالیفۆرنیا و شاری ساندیاگۆ نیشتەجێ بوو. لە ئەوێشدا، سەرەڕای ژیانی سەختی ئامریکا، بە خوێندنەوەی کتێب و گۆڤار و بەردەوامی لە چالاکییەکان، وەک خەباتکارێکی زۆر چالاکی سیاسیی کورد و دێموکرات ناسرا و تا دوا ساتەکانی ژیانی وەک ئەندامێکی بە پرستیژ، بە ئەخلاق و نەتەوەیی درێژەی بە خەبات و تێکۆشانی دا.
ماوەیەکی کەم بوو هاتبووە هەرێمی کوردستان و چاوهڕێ بوو ڕێژیمی ئیسلامی ئێران بڕووخێت و لەگەڵ حیزب و هاوبیر و هاوسەنگەرانی بە ئازادی بگەڕێتەوە ناو نەتەوە و نیشتمانی خۆی. بەڵام مەخابن، ڕۆژی ١٥ی ڕێبەندان لە ڕێگەی هەڵەبجە بۆ سلێمانی، دڵە پڕ لە هومێدەکەی، لە لێدان کەوت.
ناوەندی ڕاگەیاندنی حیزبی دێموکراتی کوردستانی ئێران بەو بۆنەوە سەرەخۆشی لە بنەماڵە، خزم و کەسوکاری ناوبراو دەکات و خۆی بە هاوبەشی خەمیان دەزانێت.
