پێنج کچە یاریزانی بوێری هەڵبژاردەی تۆپی پێی ژنانی ئێران دوای ئەوەی لە یارییەکی نێودەوڵەتیدا ئامادە نەبوون سروودی کۆماری ئیسلامی بخوێننەوە، لەلایەن دەوڵەتی ئوسترالیاوە مافی پەنابەرییان پێدرا.
تونی بۆرک، وەزیری کۆچی ئوسترالیا، جەختی کردەوە کە ئەو کچانە ئێستا لە شوێنێکی ئارامدان و ژیانیان پارێزراوە.
هاوکات دۆناڵد ترەمپ هۆشدارییەکی دابوو کە گەڕاندنەوەی ئەم وەرزشوانانە بۆ ئێران "هەڵەیەکی مرۆیی گەورەیە".
لە بەرامبەردا، دادستانی گشتیی کۆماری ئیسلامی بە زمانێکی هەڕەشەئامێز و چەواشەکارانە کەوتە هەوڵدان بۆ گەڕانەوەیان و ئیدعای ئەوەی کرد کە ئەم کچانە "بەهۆی تووڕەیی و هەستیارییەوە" تووشی پیلان بوون.
دادستانی گشتی ڕێژێم بەبێ ئاماژەدان بە هەڕەشەکان، داوای لێکردن بگەڕێنەوە بۆ ئەوەی "لە ڕیزی ڕووبەڕووبوونەوەی دوژمناندا بن"، بەڵام ئەم هەوڵانەی دادستانی وەک هەمیشە تەنیا بۆ ترساندن و دامرکاندنەوەی دەنگی ناڕەزایەتی وەرزشوانان بوو کە لە ئاستی نێودەوڵەتیدا شکستی هێنا.
