میلیشیاکانی سەر بە ڕێژیمی ئێران لە عێراق، لە دوای زنجیرەیەک هێرشی ئاسمانی بۆ سەر چەندین بنکەیان، زیانی گیانیی زۆریان بەرکەوتووە.
نوێترین هێرشەکان بنکەیەکی هێزەکانی حەشدی شەعبی لە شاری قایم لە ڕۆژاوای عێراق و لە نزیک سنووری سووریەی کردووەتە ئامانج و بەپێی ڕاپۆرتەکان، لەم هێرشانەدا لانیکەم ١٠ ئەندامی ئەم گرووپە کوژراون.
بەپێی ڕاپۆرتی تۆڕی میدیایی "ڕووداو" لە هەولێر، زیاتر لە ١٢ ئەندامی هێزەکانی حەشدی شەعبی لە دوو هێرشی جیاوازدا کە بەرەبەیانی پێنجشەممە بنکەکانی ئەو گرووپەی لە پارێزگاکانی کەرکوک و ئەنبار کردە ئامانج، کوژراون.
ئەم هێرشانە لە کاتێکدا ئەنجام دراون کە گرژییە ناوچەییەکان لە دوای شەڕی نێوان ئەمریکا، ئیسرائیل و ئێران ڕووی لە زیادبوون کردووە.
ڕاپۆرتەکان ئاماژە بەوە دەکەن کە ئەم گرووپە میلیشیایانە لە سەرەتای دەستپێکردنی تێکهەڵچوونەکانەوە، سەدان هێرشیان وەک بریکاری ڕێژیمی ئێران دژی ئامانجە جیاوازەکان لە ناوچەکەدا ئەنجام داوە.
