فەرماندەیی ناوەندیی ئەرتەشی ئەمریکا (سێنتکام)، ڕۆژی هەینی ٢٢ی ڕەشەمە، زانیاریی نوێی لەبارەی کەوتنەخوارەوەی فڕۆکە سووتەمەنیبەرەکەی جۆری KC-135 بڵاوکردەوە و ڕایگەیاند کە لە ئەنجامی ئەو ڕووداوەدا، ٤ ئەندام لە کۆی ٦ ئەندامی تیمی فڕۆکەوانییەکە گیانیان لەدەستداوە.
بەپێی ڕاگەیەندراوەکەی سێنتکام، ڕووداوەکە شەوی پێنجشەممە لە کاتی بەڕێوەچوونی ئۆپەراسیۆنی "تووڕەیی حەماسی'' و لە ناوچەیەکی ئارامی ڕۆژئاوای عێراق ڕووی داوە.
سێنتکام جەختی کردەوە کە کەوتنەخوارەوەی فڕۆکەکە بەهۆی تەقەی دوژمن یان تەقەی هەڵەی هێزە خۆییەکان نەبووە و لە ئێستاشدا لێکۆڵینەوە بۆ دۆزینەوەی هۆکاری سەرەکیی تەکنیکیی ڕووداوەکە بەردەوامە.
لە کاتی ڕووداوەکەدا دوو فڕۆکەی لەو جۆرە پێکەوە بوون؛ فڕۆکەی یەکەم کەوتووەتە خوارەوە و فڕۆکەی دووەم توانیویەتی بە سەلامەتی بنیشێتەوە.
فڕۆکەی KC-135 پشتیوانی هێزی ئاسمانیی ئەمریکایە کە سووتەمەنی لە ئاسماندا بە فڕۆکە شەڕکەرەکان و بۆمبهاوێژەکان دەگەیەنێت.
