لە ئاکامی هێرشە ئاسمانییە بەردەوامەکانی ئیسرائیل و ئەمریکا بۆ سەر ناوەندە سەربازی و ئابوورییەکانی ئێران و شارەکانی ڕۆژهەڵاتی کوردستان، ڕێژیمی کۆماری ئیسلامی لە هەموو لایەکەوە زەربەی جەرگبڕی خواردووە و کۆنتڕۆڵی بەسەر دۆخی نێوخۆیی وڵاتدا نەماوە.
بەپێی ئەو هەواڵانەی گەیشتوونەتە بەشی هەواڵی "ناوەندی ڕاگەیاندنی حیزبی دێموکراتی کوردستانی ئێران"، هاوکات لەگەڵ ئاڵۆزییەکانی شەڕ، دۆخی بژێویی خەڵک و بازاڕ لە شارەکانی ڕۆژهەڵات بەتەواوی تێک چووە.
بۆ نموونە لە شاری سەقز، بێنزینخانەکان بە نیوەچڵ کار دەکەن و سووتەمەنی لە بازاڕدا زۆر کەم بووەتەوە.
هاوکات کەرەستە خۆراکییە سەرەکییەکانی وەک ڕۆن و برنج لە بازاڕەکاندا دەگمەن بوون و نرخەکانیان بە شێوەیەکی هاوسارپچراو بەرز بووەتەوە.
هەروەها نرخی شیرەمەنی و دەرمان ڕۆژانە گۆڕانکارییان بەسەردا دێت و جێگیر نین.
بەپێی ئەو ڕاپۆرتەکان، کاسبکاران و بازاڕیان بەهۆی ناسەقامگیریی ئابوورییەوە تووشی بێکاری بوون و بازاڕی کار وەستاوە.
