فەرماندەیی ناوەندیی ویلایەتە یەکگرتووەکانی ئەمریکا (سێنتکام)، هاوکات لەگەڵ ١٨هەمین ڕۆژی شەڕ دژی ڕێژیمی ئێران، ڕاپۆرتێکی نوێی لەسەر هێرشە ئاسمانییەکانی بۆ سەر بنکە سەربازییەکانی ئێران بڵاو کردەوە.
بەپێی ڕاگەیەندراوی ئەم فەرماندەییە، هێزەکانی ئەمریکا لە زنجیرەیەک هێرشی ورد و چڕدا، توانیویانە کۆمەڵێک ئامانجی ستراتیژیی سەر بە ڕێژیمی ئێران دەستنیشان بکەن و بە تەواوی لەنێویان ببەن.
سێنتکام جەختی کردووەتەوە کە هێزەکانیان بەردەوام دەبن لە ئەرکی تێکشکاندنی تەواوی ئەو ئامانجانەی کە مەترسی بۆ سەر ئەمنییەتی ئەمریکاییەکان و سەقامگیریی وڵاتانی دراوسێی ئێران دروست دەکەن.
ئەم ئۆپەراسیۆنە بەرفراوانانە لە کاتێکدا ئەنجام دەدرێن کە ڕاپۆرتە نێودەوڵەتییەکان باس لە داڕمانی کادری ڕێبەرایەتیی کۆماری ئیسلامی و کوژرانی چەندین کەسایەتیی سەرەکیی ڕێژیم دەکەن. ئەمەش نیشانەی چڕبوونەوەی گوشارە هەمەلایەنەکانە بۆ کۆتاییهێنان بە توانای هێرشبەری و تێکدەرانەی تاران لە هەژدەهەمین ڕۆژی ئەم شەڕەدا.
