میدیاکانی نێوخۆی ئێران ڕایانگەیاند کە لە ئەنجامی هێرشە ئاسمانییەکانی ئەمریکا و ئیسرائیلدا، چەندین مووشەک بەر ژێرخانە سەرەکییەکانی وزە لە ناوچەی "پارس جنوبی" و ناوچەی تایبەتی ئابووریی "عەسەلوویە" کەوتوون.
بەپێی ڕاپۆرتە بڵاوکراوەکان، ئەم هێرشانە بە وردی دامەزراوەکانی پێترۆشیمی و کۆگا ستراتیژییەکانی گازیان لە قۆناغە جیاوازەکانی پاڵاوگەی عەسەلوویە کردووەتە ئامانج.
هەواڵدەریی "فارس" وێڕای پشتڕاستکردنەوەی پێکانی دامەزراوەکان، ڕایگەیاندووە کە ئاگرێکی گەورە لە چەندین کۆگای سووتەمەنی و بەشە جیاوازەکانی کارپێکردنی پاڵاوگەکەدا کەوتووەتەوە.
لە دوای ڕوودانی تەقینەوەکان، سەرچاوەکانی ڕێژیم ڕایانگەیاندووە کە پێرسۆنیلی ئەو ناوەندانە بۆ شوێنی ئارام گواستراونەتەوە و تیمەکانی فریاگوزاری و ئاگرکوژێنەوە خەریکی کۆنترۆڵکردنی ئاگرەکەن.
چاودێرانی بواری وزە پێیان وایە کە بە ئامانجگرتنی عەسەلوویە وەک چەق و مەکۆی سەرەکیی بەرهەمهێنانی گاز و سەرچاوەی داهاتی دراوی بیانیی ڕێژیم، دەبێتە هۆی پەکخستنی توانا کردارییەکان و هەناردەکردنی وزەی ئێران ئەمەش لە نێوەندی ئەم گرژییانەدا کۆماری ئیسلامی ڕووبەڕووی تەنگژەیەکی گەورە دەکاتەوە.
