"نێتبلاکس"، گرووپی سەربەخۆی چاودێریی ئینتێرنێت ڕایگەیاند کە پچڕانی ئینتێرنێت لە ئێران چووەتە ڕۆژی بیستەم و دەستڕاگەیشتنی گشتی خەڵک بە تۆڕی جیهانی ٤٥٦ کاتژمێری تێپەڕاندووە.
ئەم ماوەیە بە درێژترین داخرانیی دیجیتاڵی تۆمارکراو لە مێژووی ئێراندا ئەژمار دەکرێت و ڕیکۆردی پچڕانی ئینتێرنێتی لە کاتی خۆپیشاندانەکانی مانگی بەفرانبار شکاندووە.
بە وتەی نێتبلاکس، تەنیا گرووپێکی سنوورداری سەر بە ڕێژیم دەرفەتی دەستڕاگەیشتنیان بە ئینتێرنێتی نێودەوڵەتی هەیە و دەنگی خەڵکی ئێران لە کاتی گۆڕانکارییە سەربازییەکانی ئەم دواییەی ناوچەکەدا، نابیسترێت.
ڕێژیمی ئیسلامیی ئێران پێشتر پشتڕاستی کردووەتەوە کە دوای دەستپێکردنی ئۆپەراسیۆنی سەربازیی ئەمریکا و ئیسرائیل، ئینتێرنێتنی نێودەوڵەتی تەنیا بۆ ئەو کەسانە دابین دەکرێت کە هاوسۆزی دەسەڵاتن.
شارەزایان و ناوەندە نێودەوڵەتییەکان، ئەم هەنگاوە وەک سنووردارکردنی توندی ئازادیی زانیاری و نموونەیەکی ئاشکرای سەرکوتی دیجیتاڵی لە بارودۆخی قەیرانی ئەمنییەتی و سیاسیدا هەڵدەسەنگێنن.
