وڵاتانی ئەندام لە گرووپی حەوت لەگەڵ نوێنەری باڵای یەکیەتیی ئورووپا لە بەیاننامەیەکی هاوبەشدا، هێرشەکانی کۆماری ئیسلامی و هێزە نیابەتییەکانی دژی ژێرخانە وزەییەکانی وڵاتانی ناوچەکە، بە ناڕەوا وەسف کرد و داوای ڕاگرتنی دەستبەجێی ئەو هێرشانەیان کرد.
لەو بەیاننامەیەدا کە لەلایەن حەوت وڵاتی پیشەسازی جیهان (کانادا، فەرانسە، ئاڵمان، ئیتالیا، ژاپۆن، بریتانیا و ئەمریکا) بڵاو کراوەتەوە، جەخت لەوە کراوەتەوە کە ئەم هێرشە سەرەڕۆیانەی سەر خەڵکی سڤیل و ژێرخانە مەدەنییەکان، بەتایبەت دامەزراوەکانی وزە لە وڵاتانی ناوچەکەدا، هەڕەشەیەکی جیددیین بۆ سەر ئەمنیەتیی ناوچەیی و جیهانی.
لە درێژەی بەیاننامەکەدا، ئاماژە بە هێرشەکان کراوە بۆ سەر ژێرخانەکانی وزە لە وڵاتانی: بەحرەین، کوەیت، عومان، قەتەر، عەرەبستانی سعوودی، ئیمارات، ئوردن و عێراق و ئەم کردەوانە بە توندی مەحکوم کراون.
واژۆکەرانی بەیاننامەکە جەختیان لە پێویستی پاراستنی ڕێڕەوە دەریاییە هەستیارەکان بەتایبەت گەرووی هۆرمۆز کردەوە و پاراستنی ئەمنییەتیی دەریاوانی و زنجیرەکانی دابینکردنی جیهانییان بە پێویست زانی.
بە وتەی ئەوان، بەردەوامبوونی ئەم دۆخە دەکرێت سەقامگیری بازاڕە جیهانییەکانی وزە ڕووبەڕووی مەترسی جیددی بکاتەوە.
