فەرماندەیی ئەمریکا (سێنتکام)، ئێوارەی دووشەممە ٣ی خاکەلێوە ڕایگەیاند کە لە سەرەتای دەستپێکردنی شەڕ دژی ئێرانەوە، زیاتر لە ٩ هەزار ئۆپەراسیۆنی ئاسمانییان ئەنجام داوە و هەزاران ئامانجیان لە ناوچە جیاجیاکانی ئەو وڵاتەدا پێکاوە.
بەپێی بەیاننامەیەک کە لە تۆڕی کۆمەڵایەتیی "ئیکس" بڵاوکراوەتەوە، ئەم ئۆپەراسیۆنانە بوونەتە هۆی زیانپێگەیاندن یان تێکشکاندنی نزیکەی ١٤٠ کەشتیی ئێرانی و بەشێک لە ژێرخانە سەربازی و لۆجستییەکانی ئێرانیان کردووەتە ئامانج.
بە وتەی سێنتکام، بنکەکان، سەکۆکانی هەڵدانی مووشەک و دامەزراوە پەیوەندیدارەکان بە توانای سەربازیی ئێران لەو هێرشانەدا بە شێوەیەکی بەرفراوان پێکراون.
لە بەرامبەردا، ئێران بە هاویشتنی سەدان مووشەک و دڕۆن بۆ سەر ئیسرائیل و هەندێک لە وڵاتانی عەرەبیی دەوروبەری کەنداو کاردانەوەی نواندووە و ڕایگەیاندووە کە بەرژەوەندی و بنکەکانی ئەمریکا لە ناوچەکەدا دەکاتە ئامانج.
لەگەڵ ئەوەشدا، بە وتەی سەرچاوە ناوچەییەکان، سیستمە بەرگرییە ئاسمانییەکانی وڵاتانی عەرەبی بەشێکی بەرچاوی ئەم هێرشانەیان تێکشکاندووە و پووچەڵ کردووەتەوە.
