ئاماژە: ئەم ڕاپۆرتە لە "فاکس نیوز"ەوە وەرگیراوە و لە نووسینی "ئەفرات لاچێر"ە؛ ڕەنگدانەوەی بۆچوون یان هەڵوێستی ماڵپەڕی کوردستان میدیا نییە.

دۆناڵد ترامپ ڕایگەیاندووە کە لەگەڵ بەرپرسێکی "باڵا"ی ئێران لە پەیوەندیدایە، بەڵام تاران ئەنجامدانی ئەم جۆرە دانوستانانەی ڕەت کردووەتەوە. شرۆڤەکاران دەڵێن ئێران کەمتر وەک حکوومەتێکی ناوەندی و زیاتر وەک سیستمێک دەردەکەوێت کە لەلایەن ناوەندە تێکەڵاوەکانی دەسەڵاتەوە بەڕێوە دەبرێت و سپای پاسداران لە ناوکەکەیدایە.

سپای پاسداران؛ دەسەڵاتی ڕاستەقینەی پشت دەوڵەت

بەپێی هەڵسەنگاندنە هەواڵگرییەکان و ڕاپۆرتە نوێیەکان، سپای پاسداران وەک هێزی باڵادەست لە سیستمی سیاسیی ئێراندا کار دەکات. "بەهنام بن تالیبلوو"، ئەندامی باڵای دامەزراوەی بەرگری لە دێموکراسییەکان (FDD)، دەڵێت:'' هەم جەنگی ١٢ ڕۆژە و هەم ململانێی ئێستا، لووتکەکانی فەرماندەیی ڕێبەرایەتیی سیاسی و سەربازیی کۆماری ئیسلامیی کورت کردووەتەوە. ئەم پرۆسەیە هەروەها باڵادەستیی هێزە ئەمنییەکان و هەڵکشانی سپای پاسدارانی خێراتر کردووە.'' ناوبراو دەشڵێت: ''کۆنترۆڵی سوپا بەسەر دەوڵەتدا لە هەموو کاتێک زیاترە، لە کاتێکدا دەوڵەت لاوازتر و زیاتر پاشکۆی ئاسایشی نەتەوەیی بووە.''

شورای باڵای ئەمنییەتی میللی؛ ژووری فەرماندەیی

شورای باڵای ئەمنییەتی میللی باڵاترین مەرجەعی هەماهەنگیی سیاسەتی سەربازی و دەرەوەی ئێرانە و فەرماندە باڵاکانی سپا و بەرپرسانی ڕێژیم لەژێر چاودێریی ڕێبەردا کۆ دەکاتەوە. دەستنیشانکردنی "محەممەد باقەر زولقەدر"، فەرماندەی پێشووی سپا، وەک سکرتێری ئەو شورایە، ڕۆڵی ناوەندیی سپای لە بەڕێوەبردنی بڕیارە سەربازی و سیاسییەکاندا بەهێزتر کردووە. سەرچاوەیەکی فەرمیی ڕۆژهەڵاتی ناوەڕاست جەختی کردەوە: ''لە ئێستادا دەسەڵاتی ڕاستەقینە لە دەستی سپای پاسداراندایە و شورای باڵای ئەمنییەتی میللی بڕیارەکان بە پاڵپشتیی زۆرینەی فەرماندەکانی سپا دەردەکات.''

موجتەبا خامنەیی؛ ڕێبەری فەرمی، دەسەڵاتی ڕاستەقینە لە دەستی سپا

بە ڕەسمی، دەسەڵات لە دەستی ڕێبەر، "موجتەبا خامنەیی"دایە، بەڵام باڵادەستیی ڕاستەقینەی ئەو هێشتا ناڕوونە. "یۆسی کوپەرواسر"، سەرۆکی دامەزراوەی ستراتیژی و ئەمنییەتی ئۆرشەلیم، وتی: ''لە ئێستادا موجتەبا بریندارە و کۆنترۆڵی ئێران لە دەستی سپای پاسداراندایە. ئەو ئێستا ڕۆڵێکی تەشریفاتی هەیە، بەڵام لە ئەگەری باشتربوونیدا، کاریگەریی لەسەر سیاسەتەکان دەبێت.''

قالیباف؛ بژاردەی جێی سەرنجی ئەمریکا؟

لێدوانەکانی ترامپ سەرنجەکانی بۆ سەر "محەممەد باقەر قالیباف"، سەرۆکی مەجلیس و فەرماندەی پێشووی سپا، ڕاکێشاوە. ئەو بەهۆی پاشخانە سەربازییەکەی و پێگەی سیاسییەوە، وەک یەکێک لە بژاردە ئەگەرییەکان بۆ دانوستان خراوەتە ڕوو، بەڵام خودی قالیباف هەر جۆرە گفتوگۆیەکی لەگەڵ ئەمریکا ڕەت کردووەتەوە.

عەباس عێراقچی؛ دیپڵۆماتێکی سنووردار

عەباس عێراقچی، وەزیری دەرەوەی ڕێژیم ئێران، ڕۆڵێکی جێبەجێکاری هەیە و ڕەنگە تەنیا کاناڵێک بێت بۆ پەیوەندییەکان، بەڵام شرۆڤەکاران دەڵێن بڕیاردانە گەورەکان، بەتایبەت لە جەنگ و دانوستانەکاندا، هێشتا لە دەسەڵاتی سپای پاسداران و دامەزراوە ئەمنییە بەربڵاوەکاندایە.

بازنەی دەسەڵاتی فراوانتر

جگە لە کەسایەتییە سەرەکییەکان، ژنێراڵەکان، پیاوانی ئایینی و جێبەجێکارانی یاسا، لەوانە: ئەحمەد وەحیدی، ئیسماعیل قاآنی، عەلیڕەزا تەنگسیری، غولامحوسێن موحسینی ئەژەیی، مەسعوود پزیشکیان و کەسایەتییە باڵا ئایینییەکانی وەک سەعید جەلیلی و ئایەتوڵڵا عەلیڕەزا ئەعرافی، ئاڕاستەی ئێران دیاری دەکەن. ئەم تۆڕە پەرشوبڵاو بەڵام خۆڕاگرە، کۆڵەکەکانی سەربازی، ئایینی و سیاسی دەگرێتەوە.

کۆبەندی

سەرەڕای ناکۆکییە نێوخۆیییەکان و کێبڕکێکانی نێوخۆی سیستمەکە، شرۆڤەکاران جەخت دەکەنەوە کە دەسەڵاتی کردەیی و بڕیاردانە گەورە و چارنووسسازەکانی ئێران لە دەستی دامەزراوە ئەمنییەکان و سپای پاسداراندایە و ئەم دۆخە کاریگەریی لەسەر گۆڕانکارییە سیاسی، ئەمنییەتی و دانوستانەکانی داهاتوو دەبێت.