بەپێی ئەو زانیارییانەی لە نێوخۆی وڵاتەوە بۆ ناوەندی تەشکیلاتی حیزبی دێموکرات نێردراون، دۆخی بژێویی خەڵک گەیشتووەتە ئاستێکی کارەساتبار.
بەپێی ئەو ڕاپۆرتە نرخەکان بە شێوەیەکی سەرسووڕهێنەر بەرز بوونەتەوە و توانای کڕینی هاووڵاتییان لە پێنج دەیەی ڕابردوودا گەیشتووەتە نزمترین ئاستی خۆی.
نزیکەی ٨٠ لەسەدی کار و کاسبییەکان پەکیان کەوتووە، بازاڕەکان چۆڵن و زۆربەی کاسبکاران بەهۆی نەبوونی داهات، توانای پێدانی کرێی دوکانەکانیان نەماوە. دۆخی کرێکارانی ڕۆژکار و دەستفرۆشەکان گەیشتووەتە ئاستی "برسییەتیی ڕەها" و تەنانەت خەڵک توانای دانەوەی قەرزی دووکانە وردەواڵەکانیشیان نەماوە.
قوتابخانە و ئیدارەکان کراونەتە مۆڵگەی هێزە ئەمنییەکان، هەرچەندە دیاردەی ڕاکردنی سەربازەکان لە بەرەکانی شەڕ بەدی دەکرێت و ترس باڵی بەسەر هێزەکاندا کێشاوە ، بەڵام هێزە ئایدۆلۆژییەکان هێشتا بەوپەڕی دڕندەییەوە سەرکوتی خەڵک دەکەن. ڕێژیم بە توندی ڕێگری لە هەر چەشنە زانیاریگەیاندنێکی ئازاد دەکات و تەنیا میدیا فەرمییەکان وەک سەرچاوە ماونەتەوە.
بەهۆی پچڕانی هێڵی ئینتێرنێت، خەڵک بۆ وەرگرتنی هەواڵ ڕوویان لە کاناڵە ماهوەرییەکان کردووە. لە زۆربەی گەڕەکەکاندا پرسەی قوربانیانی شەڕ بەڕێوە دەچێت و ژمارەی کوژراوان ڕۆژانە ڕوو لە زیادبوونە.
سەرەڕای ئەو کەشە پڕ لە ترس و خەفەقانەی کە هێزە سەرکوتکەرەکان لە گەڕەکەکاندا دروستیان کردووە، بەڵام زۆرینەی هەرە زۆری خەڵک بە ئومێدەوە چاوەڕوانی کۆتاییهاتن و ڕووخانی یەکجاریی ئەم ڕێژیمە دەکەن.
