بەرەبەیانی دووشەممە ١٠ی خاکەلێوە، سزای سێدارەی دوو بەندکراوی سیاسی بە ناوەکانی "ئەکبەر دانشوەرکار" ٦٠ ساڵ و سەید "محەممەد تەقەوی سەنگدەهی" ٥٩ ساڵ، بە شێوەیەکی نهێنی و بەبێ ئاگادارکردنەوەی بنەماڵەکانیان لە بەندیخانەی قزڵحساری کەرەج جێبەجێ کرا.
ئەم دوو هاووڵاتییە پێشتر بە تۆمەتی "بەغی" و ئەندامییەتی لە ڕێکخراوی "موجاهیدینی خەلق"، لەلایەن دادگای ئینقلابی تارانەوە سزای سێدارەیان بەسەردا سەپێندرابوو.
ئاژانسی "میزان"ی سەر بە دەزگای بەناو دادی ڕێژیم، تۆمەتی وەک "کردەوەی تیرۆریستی" و "دروستکردنی لانچەر" خستووەتە پاڵیان، بەڵام چاوەدێرانی مافی مرۆڤ جەخت دەکەنەوە کە ئەم دانپێدانانە لە ژێر ئەشکەنجەی توند و لە پڕۆسەیەکی نادادپەروەرانەدا وەرگیراون.
بە لەسێدارەدانی ئەو دوو هاووڵاتییە، ژمارەی بەندکراوە سیاسییە لەسێدارەدراوەکان لە سەرەتای شەڕی نێوان ئەمریکا و ئیسرائیل لەگەڵ کۆماری ئیسلامی گەیشتووەتە ٦ کەس.
