مارکۆ ڕۆبیۆ، وەزیری دەرەوەی ئەمریکا ڕایگەیاند کە دەوڵەتی دۆناڵد ترامپ چەندین ئامراز و بژاردەی لەبەردەستدایە بۆ ڕێگریکردن لە کۆنتڕۆڵکردنی هەمیشەیی گەرووی هۆرمۆز لەلایەن کۆماری ئیسلامییەوە.
ڕۆبیۆ لە گفتوگۆیەکدا لەگەڵ کەناڵی "ئەیبیسی نیوز" ئاماژەی بە لێدوانەکانی ئەم دواییەی بەرپرسانی ئێران کرد و وتی: "ئەوان هەڕەشەی ئەوە دەکەن کە کۆنتڕۆڵی هەمیشەیی گەرووی هۆرمۆز بگرنە دەست و باج وەربگرن، بەڵام ئێمە ڕێگە نادەین شتی وا ڕووبدات."
وەزیری دەرەوەی ئەمریکا هەروەها کۆماری ئیسلامی تۆمەتبار کرد بە پشتگیریکردنی گرووپە چەکدارەکانی ناوچەکە و وتی کە ناسەقامگیری لە ڕۆژهەڵاتی نێوەڕاست بۆ ئەو ڕێژیمە دەگەڕێتەوە.
ڕۆبیۆ لە درێژەی قسەکانیدا ئامانجە ڕاگەیەندراوەکانی دەوڵەتی ئەمریکای بەم شێوەیە دیاری کرد: لاوازکردنی توانای سەربازیی ئێران، لەوانە هێزی ئاسمانی و دەریایی، کارخانەی بەرهەمهێنانی چەکووچۆڵ و سنووردارکردنی بەرنامەی مووشەکە بالستیکەکان.
بە وتەی ئەو، ئەرتەشی ئەمریکا لە بەدیهێنانی ئەم ئامانجانەدا پێشکەوتنی بەرچاوی هەبووە و پڕۆسەی ئۆپەراسیۆنە نیزامییەکان لە قۆناغە کۆتاییەکان نزیک بووەتەوە.
