لە درێژەی سیاسەتە سەرکوتکەرانەکانی کۆماری ئیسلامی لە کوردستان، ئیدارەی گشتیی ئیتلاعاتی پارێزگای ورمێ، دەستبەسەرکرانی ١٧ هاووڵاتیی بە تۆمەتی بێبنەما ڕاگەیاند.
بەپێی ئەو ڕاپۆرتە، ئەو ١٧ هاووڵاتییە لە شارەکانی بۆکان، ورمێ و چایپارە لەلایەن ناوەندە سرکوتکەرەکانی ڕێژیمەوە دەستبەسەر و پاشان بۆ شوێنی نادیار ڕاگوێزراون.
ئیدارەی ئیتلاعاتی ڕێژیم بەبێ خستنەڕووی بەڵگەی باوەرپێکراو و لە درێژەی دۆسییەسازی بۆ هاووڵاتییان، ڕایگەیاندووە کە ئەو کەسانە لە ڕیگەی ناردنی وێنە و ڤیدیۆی شوێنە سەربازییەکان بۆ ئەمریکا و ئیسرائیل و هەروەها بۆ تۆڕەکانی نەیار و ئەندامییەتی لە حیزبەکانی دژبەری کۆماری ئیسلامی دەستبەسەر کراون.
دووپاتکردنەوەی سیناریۆی تۆمەتە ئەمنییەتییەکان دژ بە هاووڵاتییانی کورد، بەشێکە لە سیاسەتی سیستماتیکی کۆماری ئیسلامی بۆ سەپاندنی گوشار، دروستکردنی ترس و کۆنترۆڵ بەسەر کوردستاندا.
لە کاتی دەستپێکی شەڕ و پەرەسەندنی گرژییەکان لە ناوچە، ڕێژیمی کۆماری ئیسلامی کەشێکی ئەمنییەتی لە کوردستان و ئێراندا خولقاندووە و سەدان کەسی بەبێ بەڵگە و بە تۆمەتی بێبنەما و بەشێوەی سەرەڕۆیانە و توندوتیژانە دەستبەسەر و بێسەروشوێن کردووە و لە نوێترین حاڵەتیشدا ڕۆژی دووشەممە ١٧ی خاکەلێوە، ٣٠ هاووڵاتیی لە کرماشان لەلایەن دامودەزگا سەرکوتکەرەکانی ڕێژیم دەستبەسەر کراون.
