ئابووریی ئێران دوای شەڕی ٤٠ ڕۆژە، ئێستا لە خراپترین دۆخی مێژوویی خۆیدایە و ڕووبەڕووی هەڵاوسانێکی هاوسارپچراو و ڕێکودێکی بێ وێنە بووەتەوە.
بەپێی هەڵسەنگاندنە ئابوورییەکان لە ساڵی ١٤٠٥دا، دۆخی بژێویی خەڵک گەیشتووەتە ئاستێکی مەترسیدار کە نەک هەر دەرئەنجامی شەڕ، بەڵکوو بەرهەمی ساڵانێک گەندەڵی و قەیرانی ساختاریی دەسەڵاتی کۆماری ئیسلامییە.
کارشناسان لەو بڕوایەدان کە ئەم شەڕە وەک خێراکەرەوەیەک کارەساتە ئابوورییەکانی جارانی قووڵتر کردووەتەوە و وڵاتی خستووەتە نێو قۆناغی "ئابووریی بۆ مانەوە" کە تێیدا تەنیا دابینکردنی پێداویستییە سەرەتاییەکان بووەتە خەمی سەرەکیی هاووڵاتییان.
پاشەکشەی ڕێژەی بەرهەمهێنان و پەککەوتنی پیشەسازییە کلیدییەکانی وەک پێترۆشیمی و پۆڵا لە ناوچە هەستیارەکانی عەسەلوویە و ئیسفەهان، گورزێکی کوشندەی لە بنەما ئابوورییەکانی وڵات داوە.
ئەم دۆخە بووەتە هۆی بێکاربوونی هەزاران کارێکار و تێکچوونی بازاڕی کار، بەتایبەت بۆ ئەو توێژەی کە لە کەرتی نافەرمیدا بێ هیچ پشتگیرییەکی یاسایی خەریکی کاسبی بوون.
ئامارەکان دەری دەخەن کە هێزی کڕینی خەڵک بە شێوەیەکی سامناک دابەزیوە و پێشبینی دەکرێت ڕێژەی هەڵاوسانی خاڵ بە خاڵ لە کۆتایی ساڵدا لە ١٤١ لەسەد تێپەڕێت، کە ئەمەش بە واتای وردوخاشبوونی تەواوی ژێرخانی بژێویی خێزانە ئێرانییەکانە.
لەلایەکی دیکەوە، بڕینی ئینتێرنێتی نێودەوڵەتی لەلایەن ڕێژیمەوە زیانێکی ٢٠٠ هەزار میلیارد تمەنی بە کار و کاسبییە دیجیتاڵییەکان گەیاندووە و متمانەی سەرمایەگوزارانی بە تەواوی لەنێو بردووە. لە کاتێکدا کە کۆماری ئیسلامی چاوی لە دانوستانە نوێیەکانە بۆ ڕزگارکردنی خۆی لە داڕمان، بەڵام تەقینەوەی ڕێژەی هەژاریی ڕەها و نایەکسانییە کۆمەڵایەتییەکان نیشانەی ئەوەن کە کۆمەڵگە چیتر توانای بەرگەی ئەم هەموو گوشارە ئابوورییانەی نییە.
