هەواڵدەریی ڕۆیتەرز لە زاری یاداشتێکی فەرماندەیی ناوەندیی ئەمریکا (سێنتکام) بڵاوی کردەوە کە گەمارۆ دەریایییەکەی ئەمریکا "تەواوی هێڵە کەناراوییەکانی ئێران"، لەوانە بەندەرەکان و وێستگەکانی نەوت دەگرێتەوە.
بەپێی ئەم ڕاپۆرتە، گەمارۆکە لە دەریای عومان و دەریای عەرەب، لە ڕۆژهەڵاتی گەرووی هۆرمۆز جێبەجێ کراوە و هەموو کەشتییەکان، بێ گوێدانە ئاڵاکانیان، دەگرێتەوە.
سێنتکام هۆشداریی داوە کە ئەو کەشتییانەی بەبێ مۆڵەت بچنە ناوچەکە یان لێی بێنە دەرەوە، ڕووبەڕووی ''ڕێگری لێکردن، گۆڕینی ئاراستە و دەستبەسەرداگرتن" دەبنەوە.
لە یاداشتەکەدا هاتووە کە گەمارۆکە لە کاتژمێر ١٤:٠٠ بە کاتی گرینویچ (GMT) دەستی پێکردووە.
هەروەها جەخت کراوەتەوە کە بارە مرۆڤدۆستانەکان، لەوانە خۆراک و پێداویستییە پزیشکییەکان، بە مەرجی پشکنین ڕێگەیان پێ دەدرێت و تێپەڕبوونی ترانزێتی بێلایەن لە گەرووی هۆرمۆزەوە بۆ وڵاتانی جگە لە ئێران سنووردار ناکرێت.
